Hindistan rəqəmsal əhali siyahıyaalınması çərçivəsində dilənçilər və evsizlər üçün ayrıca kateqoriyadan imtina edib.
Oxu.Az "The Times of India"ya istinadən xəbər verir ki, müvafiq bənd "qeyri-iqtisadi fəaliyyət" kateqoriyasından çıxarılıb.
Bundan sonra dilənçiliklə məşğul olan və daimi yaşayış yeri olmayan insanlar "digərləri" kateqoriyasına aid ediləcəklər. Əvvəllər onlar tələbələr, himayədə olan şəxslər və pensiyaçılarla birlikdə iqtisadi cəhətdən qeyri-fəal əhali arasında ayrıca nəzərə alınırdılar.
Qəzetin mənbələrinin bildirdiyinə görə, ayrıca kateqoriyadan imtina edilməsinin səbəbi əvvəlki siyahıyaalmalar zamanı az sayda hindistanlının özünü dilənçi və evsiz kimi təqdim etməsi olub. Qeyd olunur ki, insanlar aşağı sosial statuslarını etiraf etmək istəmirlər.
2011-ci ildə bu kateqoriyaya təxminən 380 min nəfər, 2001-ci ildə isə 630 min nəfər daxil edilmişdi. "The Times of India"nın mənbələri bu rəqəmləri etibarlı hesab etməyiblər.
