Hindistanın şimal-şərqində baş verən şiddətli daşqınlar nəticəsində ölənlərin sayı 85-ə çatıb.
Oxu.Az-ın xəbərinə görə, bu barədə "Deccan Herald" nəşri məlumat verib.
Məlumata görə, təbii fəlakət Assam ştatında anomal musson yağışları səbəbindən baş verib.
İyulun sonlarında ştatın baş naziri Himanta Bisva Sarma yağıntının normadan 436% çox olduğunu bəyan edib. Bu da daha əvvəllər belə problemlərlə üzləşməmiş kəndlərin su altında qalmasına səbəb olub. Hakimiyyət orqanları əhaliyə kömək etmək üçün 140-dan çox müvəqqəti sığınacaq düşərgəsi yaradıblar.
"Rəsmi məlumata görə, hazırda beş ərazidə təxminən 135 000 insan zərərçəkmiş kimi qeydə alınıb, eyni zamanda üç nəfər ölüb və builki daşqın qurbanlarının ümumi sayı 85-ə çatıb", - deyə qəzet yazıb.
Sibsaqar dairəsi ən çox ziyan çəkib və orada üç yeni ölüm halı qeydə alınıb. Bu bölgədə 55 mindən çox insan zərər görüb, 335 yaşayış məntəqəsini su basıb və 15 400 hektar kənd təsərrüfatı torpağına ziyan dəyib.
