"SpaceX" şirkətinə məxsus "Falcon 9" daşıyıcı raketinin istifadə olunmuş yuxarı pilləsi bir il yarım davam edən nəzarətsiz hərəkətdən sonra Ayın səthinə çırpılıb.
Oxu.Az xəbər verir ki, bu barədə "Daily Mail" nəşri məlumat yayıb. Hadisə Yerin təbii peykinin görünməyən tərəfindəki Eynşteyn krateri yaxınlığında baş verib.
Astronomların hesablamalarına əsasən, nəhəng obyekt Ay torpağına saatda təxminən 8.7 min kilometr sürətlə çırpılıb. Sürətləndirici blok 2025-ci ildə avtomatik missiyanın buraxılmasından sonra Yer və Ay ətrafı trayektoriyaya düşmüşdü. Əsas işini bitirdikdən sonra bu pillə orbitdən çıxarılmayıb və qravitasiya qüvvələrinin təsiri altında onun yolu tədricən Aya doğru dəyişib.
Sərt toqquşma nəticəsində səthdə yeni krater yaranıb, kosmosa isə böyük reqolit və toz buludu qalxıb. Toqquşma nöqtəsinin Yerdən uzaqda yerləşməsi səbəbindən bu prosesi birbaşa müşahidə etmək mümkün olmayıb.
Alimlər qeyd edirlər ki, bu hadisə planetimiz üçün heç bir təhlükə yaratmır. Əksinə, tədqiqatçılar zərbə proseslərinin dinamikasını və kosmik tullantıların davranışını daha yaxşı anlamaq üçün yaranmış çuxurun parametrlərini öyrənməyi planlaşdırırlar.
Bu hadisə kosmosun çirklənməsi ilə bağlı müzakirələri yenidən aktuallaşdırıb. Ekspertlər xəbərdarlıq edirlər ki, əgər kosmik agentliklər və özəl şirkətlər raket pillələrinin utilizasiyası üzrə sərt standartlar tətbiq etməzlərsə, Ay missiyalarının sayı artdıqca bu cür insidentlər daha da çoxalacaq.
