İngiltərədə min nəfərdən çox sakin polisin hərəkətlərinə etiraz məqsədilə nümayişlərə başlayıb.
Oxu.Az xəbər verir ki, bu barədə "Sky News" telekanalı məlumat yayıb.
Bildirilib ki, kütləvi aksiya, hüquq-mühafizə orqanları əməkdaşlarının bıçaq yarası almış 18 yaşlı tələbə Henri Novakı həbs etməyə çalışdığını əks etdirən video görüntülərin yayılmasından sonra baş tutub. Etirazçılar Sauthempton şəhərinin mərkəzindən keçərək hadisənin baş verdiyi yerə doğru yürüş ediblər. Nümayişçilərin qarşısını almağa cəhd edən polis əməkdaşlarına tərəf daş və şüşə butulkalar atılıb. Aksiyada iştirak edən kütlə İngiltərə və Böyük Britaniya bayraqlarını dalğalandırıb.
Qeyd olunub ki, 2025-ci ilin dekabr ayının əvvəllərində yerli siqh icmasının nümayəndəsi Vikram Diqva Henri Novaka altı bıçaq zərbəsi endirib. Diqva irqçi hücuma məruz qaldığını iddia edərək özü polisə zəng edib. Hadisə yerinə gələn polislər Novakı saxlamağa çalışıblar, lakin qısa müddət sonra gələn tibb işçiləri onun öldüyünü təsdiqləyiblər.
Məhkəmə baxışı zamanı Diqvanın irəli sürdüyü versiya öz təsdiqini tapmayıb. İyunun 1-də ona 21 ildən sonra şərti azadlığa çıxma imkanı olmaqla ömürlük həbs cəzası verilib. İyunun 2-də isə polislərin döş kameralarından qeydlər ictimailəşdirilib. Həmin kadrlarda asayiş keşikçilərinin yaralı olduğunu və nəfəs almaqda çətinlik çəkdiyini deyən Henri Novakın sözlərinə məhəl qoymadan ona qandal vurmağa çalışdıqları görünür. Hüquq-mühafizə orqanları baş vermiş hadisə və öz hərəkətləri ilə bağlı üzr istəyib, saxlanılma prosesində iştirak edən zabitlərdən biri isə vəzifəsindən istefa verib. Məhkum olunmuş şəxsin ailəsi də baş verənlərə görə üzrxahlıq edib.
