İran tərəfi 82-ci cavab əməliyyatları çərçivəsində ABŞ-nin Küveyt, Bəhreyn və Səudiyyə Ərəbistanı ərazisindəki hərbi obyektlərini hədəf alıb.
Oxu.Az xəbər verir ki, bu barədə məlumatı ISNA informasiya agentliyi İran Silahlı Qüvvələrinin İslam İnqilabı Keşikçiləri Korpusunun (SEPAH) rəsmi açıqlamasına əsasən yayımlayıb.
"Həqiqi Vəd-4" əməliyyatının 82-ci mərhələsi Küveyt ərazisindəki ABŞ-yə məxsus "Arifcan", Səudiyyə Ərəbistanındakı "Əl-Xərc" bazalarına və ABŞ-nin KGL logistik müdafiə kompleksinə qarşı müvəffəqiyyətlə icra olunub. Bəhreyndə yerləşən "Şeyx İsa" aviabazasındakı "Patriot" radiolokasiya stansiyası, "P-8" kəşfiyyat təyyarələrinin mərkəzi, yanacaq çənləri, "MQ-9 PUA" anqarı və Küveytdəki "Əli əl-Salim" hava bazasında PUA-lar üçün rabitə peyki anteni məhv edilib", - deyə açıqlamada qeyd olunur.
İranın İslam İnqilab Keşikçiləri Korpusu (SEPAH) İsrail ərazisindəki hədəflərə və regionda yerləşən ABŞ hərbi obyektlərinə raket və pilotsuz uçuş aparatları ilə növbəti zərbə seriyasına başlayıb.
Oxu.Az-ın məlumatına görə, bu barədə İslam Respublikasının dövlət televiziyası xəbər verib.
Qeyd olunub ki, hazırkı hücum dalğası artıq 82-ci hesab edilir. Əsas zərbənin istiqaməti barədə hələlik məlumat yoxdur.
Xatırladaq ki, fevralın 28-də İsrailin müdafiə naziri İsrael Kats İsrail Müdafiə Qüvvələrinin İrana qabaqlayıcı zərbə endirdiyini açıqlayıb. Daha sonra ABŞ Prezidenti Donald Tramp ölkəsinin də İrana qarşı hərbi əməliyyatda iştirak etdiyini bildirib.
İran isə öz növbəsində İsrailə onlarla ballistik raket atıb. İsrail Müdafiə Qüvvələri atışları təsdiqləyib, ölkə daxilində sirenlər səslənib və hava hücumundan müdafiə sistemləri işə salınıb.
Martın 1-də İranın Ali Lideri Əli Xameneinin hücumlar zamanı öldürüldüyü bəyan olunub.
İran ABŞ-nin hərbi bazalarının yerləşdiyi qonşu ölkələrin əksəriyyətinə raket zərbələri endirib. Buna görə də həmin ölkələrdə hava məkanı müvəqqəti bağlanıb.
Həmçinin Hörmüz boğazından gəmilərin keçidində ciddi problemlər yaranıb.
