İsrail Müdafiə Qüvvələri (İMQ) Amsterdamda futbol matçından sonra israillilərə qarşı hücuma görə xilasetmə əməliyyatı həyata keçirəcək.
Oxu.Az bu barədə TASS-a istinadən xəbər verir.
Məlumata görə, Amsterdamda israillilərə qarşı ciddi və zorakı hadisələrdən sonra siyasi rəhbərliyin göstərişi və vəziyyətin qiymətləndirilməsinə uyğun olaraq, İMQ Niderland hökuməti ilə koordinasiya şəklində dərhal xilasetmə əməliyyatına başlamağa hazırlaşır. Missiya yük təyyarələrindən istifadə edilməklə həyata keçiriləcək və tibbi və xilasetmə qruplarını əhatə edəcək. Arxa cəbhə komandanlığı müxtəlif idarələr, ordu bölmələri və İsrail təhlükəsizlik orqanları ilə əməkdaşlıq çərçivəsində xilasetmə əməliyyatına rəhbərlik edəcək.
Daha əvvəl Avropa Liqası çərçivəsində Amsterdamda yerli "Ayaks" və Təl-Əvivin "Makkabi" komandaları arasında keçirilən futbol matçından sonra Fələstin tərəfdarları hesab edilən şəxslər tərəfindən ən azı 10 israillinin hücuma məruz qaldığı bildirilmişdi.
