ABŞ qırıcıları İsrailin hava məkanını İran raketlərindən qoruyur

İyunun 18-nə keçən gecə ABŞ Hərbi Hava Qüvvələri Şimali Amerikadan Avropa bazalarına irimiqyaslı təyyarə transferi həyata keçirib.

Oxu.Az xəbər verir ki, "Aurora Intel" tədqiqat qrupunun və "ABC News" telekanalının mənbələrinin məlumatına görə, Avropaya bir neçə "C-17 Globemaster III" nəqliyyat təyyarəsi, "KC-135 Stratotanker" strateji tankerləri və müxtəlif modifikasiyalı qırıcılar göndərilib.

Bu, son günlər ABŞ hərbi təyyarələrinin yenidən yerləşdirilməsinin ikinci dalğasıdır. Bundan əvvəl, iyunun 16-da "Politico" qəzeti ABŞ Hərbi Hava Qüvvələrinə məxsus daşıyıcı və tankerlərin Avropaya göndərilmiş ilk partiyası haqqında məlumat vermişdi. Məlumata görə, gələn təyyarələr Böyük Britaniya, İspaniya, Almaniya, Yunanıstan və bir sıra digər Avropa ölkələrindəki aviabazalarda yerləşdirilib.

Qeyd olunur ki, ABŞ qırıcıları artıq İsrailin hava məkanının İranın raket hücumlarından qorunmasında fəal iştirak edirlər. Bundan əlavə, bölgədəki ABŞ hərbi obyektlərinin və bazalarının təhlükəsizliyini təmin etmək üçün təyyarələrin bir hissəsi birbaşa Yaxın Şərqə yönləndirilir.

Xatırladaq ki, İsrail iyunun 13-nə keçən gecə İranın nüvə proqramına qarşı hərbi əməliyyata başlayıb. Bir gün keçməmiş İran cavab olaraq, raket zərbəsi endirib. Sonrakı günlərdə qarşıdurma yeni qarşılıqlı hücumlarla davam edib. Hər iki tərəf ölən və yaralananların sayını rəsmən təsdiqləyib, həmçinin bir sıra hərbi və mülki obyektlərin vurulduğunu etiraf edib.