Amerika Birləşmiş Ştatlarının (ABŞ) Prezidenti Donald Tramp İranla bağlı siyasətində yenidən gözləmə mövqeyinə keçib.
Oxu.Az xəbər verir ki, bu barədə "The Wall Street Journal" (WSJ) nəşri ABŞ Administrasiyasındakı anonim mənbələrinə istinadən məlumat yayıb.
Nəşrin məlumatında bildirilir ki, irimiqyaslı müharibəyə başlamaq istəməyən və diplomatik danışıqlara ehtiyatla yanaşan Tramp iqtisadi ziyan vurmaq məqsədilə maliyyə sanksiyalarının, eləcə də İranın dəniz limanlarının ABŞ tərəfindən blokadaya alınmasının təsirini artırmaq üçün vaxt qazandıran gözləmə strategiyasını tətbiq edir.
Qəzetin yazdığına görə, sözügedən strategiya Amerika liderinin müşavirləri tərəfindən birmənalı şəkildə müdafiə olunub. Lakin bir sıra ekspertlər İran tərəfinin bu gedişata sərt müqavimət göstərəcəyini proqnozlaşdırırlar.
Nəşr Vaşinqton administrasiyasında və kəşfiyyat orqanlarında işləmiş, həmçinin İranın nüvə proqramı məsələləri ilə məşğul olmuş Erik Brüerin fikirlərini sitat gətirir:
"ABŞ-nin tətbiq etdiyi blokada onsuz da böhranda olan İran iqtisadiyyatını daha da ağırlaşdıra bilərmi? Əlbəttə, elə bu səbəbdən də kimsə Tehranın fəaliyyətsiz qalacağını düşünməməlidir. Onlar mütləq reaksiya verəcəklər. İran nümayiş etdirdi ki, Birləşmiş Ştatlarla müqayisədə qat-qat böyük dözümlülük potensialı var. Mövcud vəziyyətdə hər hansı dəyişikliyə dair əlamət müşahidə etmirəm. ABŞ-nin yaxşı variantları yoxdur, yalnız pis variantları var".
