"Lotus" xüsusi avtomobil buraxdı

"Lotus Emira" kupesi "Clark Edition" adlı məhdud seriyada buraxılıb.

Oxu.Az auto.ru-ya istinadən xəbər verir ki, yeni model Cim Klarkın 1965-ci ildə İndianapolis-500 yarışında və "Formula-1" çempionatında qazandığı qələbələrin 60 illiyinə həsr edilib.

Avtomobil 1965-ci ilin yarış bolidi stilində hazırlanıb. Bu modeldən ümumilikdə 60 ədəd buraxılacaq.

Model üçün əsas olaraq Klarkın İndianapolisdə qələbə qazandığı "Lotus Type 38" bolidi götürülüb. Xüsusi versiya 406 at gücü olan 3.5 litrlik V6 turbo mühərriklə təchiz edilib. 6 pilləli mexaniki sürət qutusu və artan sürtünmə diferensialı ilə arxa təkərlərə güc ötürülür. Kupe 0-97 km/s (60 mil/s) sürətə 4.2 saniyədə çatır və maksimum 290 km/s sürət yığır.

Almaniyada məhdud seriyanın qiyməti 140 min avrodan başlayır.