ABŞ Milli Basketbol Assosiasiyasının (NBA) altıqat çempionu Maykl Cordan doğma şəhəri Vilminqtonda yerləşən tibb mərkəzinə 10 milyon dollar ianə edib.
Oxu.Az xəbər verir ki, bu barədə ESPN məlumat yayıb.
Məlumata görə, ianədən sonra klinikanın Nevrologiya İnstitutu Cordanın anası Delorisin adını daşıyacaq.
"Anam mənə şəfqətin vacibliyini öyrədib. Onun xatirəsini anmaq üçün ehtiyacı olan insanlara ən müasir nevroloji yardımın göstərilməsinə dəstək olmaqdan daha yaxşı bir yol təsəvvür edə bilmərəm", - deyə basketbol ulduzu bildirib.
Xatırladaq ki, Maykl Cordan dünya basketbol tarixinin ən böyük oyunçularından biri hesab olunur. O, ikiqat Olimpiya çempionudur (1984, 1992) və "Çikaqo Bullz" komandasının heyətində altı dəfə NBA çempionu olub.
