Qadınlara qarşı narkotik vasitələrdən istifadə edilməklə törədilən seksual zorakılıq cinayətlərinə qarşı yönəlmiş genişmiqyaslı "Medusa" (Project Medusa) beynəlxalq əməliyyatı çərçivəsində doqquz ölkənin hüquq-mühafizə orqanları 57 şübhəli şəxsi saxlayıb.
Oxu.Az xəbər verir ki, bu barədə "Deutsche Welle" "Europol"un mətbuat xidmətinə istinadən məlumat yayıb. "Europol"un açıqlamasında bildirilir:
"İstintaq zamanı cinayətkarların qurbanları obyektləşdirən və insanlıqdan çıxaran onlayn şəbəkələri müəyyən edilib. Onlar şifrələnmiş messencerlərdən, forumlardan və qapalı çatlardan təcrübə mübadiləsi aparmaq, qanunsuz davranışı normallaşdırmaq, reseptlə satılan dərmanların və narkotik vasitələrin qanunsuz dövriyyəsini təşviq etmək, eləcə də cinayət əməllərini əlaqələndirmək üçün istifadə ediblər".
"Medusa" əməliyyatı 2026-cı ilin aprelindən etibarən Almaniyanın Federal Cinayət Polisi İdarəsinin (BKA) və Böyük Britaniyanın Milli Cinayətkarlıqla Mübarizə Agentliyinin rəhbərliyi, "Europol"un koordinasiyası ilə həyata keçirilib. Əməliyyata Braziliya, Kanada, Fransa, Macarıstan, Niderland, İspaniya və ABŞ-nin hüquq-mühafizə orqanları da cəlb olunub.
"Europol"un məlumatına görə, qurbanların demək olar ki, hamısı qadınlardır. İstintaq zamanı kişilərdən ibarət bir neçə onlayn şəbəkə aşkar edilib. Onlar əsasən həyat yoldaşlarını və ya sevgililərini narkotik preparatlarla huşsuz vəziyyətə salaraq onlara təcavüz edir, daha sonra isə bu prosesi əks etdirən foto və videoları internetdə paylaşıblar.
Əməliyyat başladığı dövrdən bəri ümumilikdə 113 cinayət işi açılıb. 156 şübhəli və zərərçəkənin şəxsiyyəti müəyyən edilib, həmçinin cinayətkarların fəaliyyətini koordinasiya etdikləri dörd qapalı onlayn icma aşkarlanıb.
Araşdırmaya Fransada böyük rezonans doğuran Jizel Peliko işi təkan verib. Belə ki, onun keçmiş həyat yoldaşı Dominik Peliko illərlə qadına gizli şəkildə narkotik verərək huşsuz vəziyyətə salmaqda və digər şəxsləri onu zorlamağa dəvət etməkdə təqsirli bilinib. O, 2024-cü ilin dekabrında ağırlaşdırıcı hallarda zorlama cinayətinə görə 20 il müddətinə azadlıqdan məhrum edilib.
