"Yum Brands" şirkəti "Pizza Hut" restoranlar şəbəkəsinin 2.7 milyard dollara satıldığını açıqlayıb.
Oxu.Az "Reuters" agentliyinə istinadən xəbər verir ki, aktivlərin satışı sürətli qidalanma bazarında rəqabətin güclənməsi və istehlakçıların xərclərə daha ehtiyatla yanaşması ilə əlaqələndirilir.
Məlumata görə, "Pizza Hut"ın Çindəki biznesi "Yum China" şirkəti tərəfindən 1.2 milyard dollara alınacaq. Şəbəkənin qalan hissəsi isə 1.5 milyard dollar qarşılığında "LongRange Capital" investisiya şirkətinə satılacaq.
Qeyd olunur ki, "Yum Brands" may ayında "LongRange Capital" ilə eksklüziv danışıqlara başladıqdan sonra "Pizza Hut"la bağlı müxtəlif variantları nəzərdən keçirdiyini açıqlamışdı. Şirkət şəbəkənin digər brendlərlə, o cümlədən "Taco Bell"lə müqayisədə inkişaf tempinin zəifləməsi səbəbindən satış ehtimalını da istisna etmirdi.
Məqalədə vurğulanır ki, fastfud bazarında tələbatın zəifləməsi davam edir. Eyni zamanda, ABŞ-də fəaliyyət göstərən pizza şəbəkələrində xammal və inqrediyent xərcləri də artmaqdadır.
Hazırda "Pizza Hut" ABŞ-də 6 500 restoranla ölkənin ikinci ən böyük pizza şəbəkəsidir. Ötən il şirkətin ABŞ bazarında satış həcmi 5.6 milyard dollar təşkil edib. Dünyada isə təxminən 20 min "Pizza Hut" restoranı fəaliyyət göstərir.
