Yeni ilin ilk günündə Nyu-Orleanda 14 nəfərin ölümü ilə nəticələnən terror aktında şübhəli bilinən Şəmsuddin Cabbar əvvəllər iki dəfə şəhərə səfər edib və "Meta"nın ağıllı eynəkləri ilə Fransız məhəlləsinin videosunu çəkib.
Oxu.Az-ın verdiyi məlumata görə, bu barədə "Associated Press" Federal Təhqiqat Bürosunun nümayəndəsinə istinadən məlumat yayıb.
Velosipeddən çəkilmiş video turistlərlə dolu olan, bayram günləri və gecələri ilə məşhur Nyu-Orleanın Fransız məhəlləsinin küçələrini göstərir. Eynəklər şübhəlinin ölümündən sonra onun üzərində tapılıb. O, hücum günü eynəkləri taxıb, lakin aktivləşdirməyib.
FTB-dən bildirilib ki, Cabbar hücumdan əvvəl Misir və Kanadaya da səfər edib, lakin bu səfərlərin hücumla əlaqəli olub-olmadığı hələ məlum deyil. Bürodan səfərlərin səbəblərini müəyyən etmək üçün həmin vaxt onunla görüşən hər kəsin axtarıldığı vurğulanıb.
Federal qurumlar hesab edir ki, ABŞ vətəndaşı olan hərbçi Cabbar terror aktını törətməyə İŞİD terror qruplaşması tərəfindən ilhamlandırılıb.
Xatırladaq ki, yanvarın 1-də Cabbarın "Ford" avtomobili Nyu-Orleanın Fransız məhəlləsində küçədə izdihama çırpılıb. Sürücü dayandıqdan sonra maşından düşüb və insanlara atəş açıb. 15 nəfər həlak olub və təxminən 30 nəfər xəsarət alıb. Cinayətkar polis ilə atışma zamanı öldürülüb. FTB nəqliyyat vasitəsinə baxış keçirib və əldəqayırma partlayıcı qurğu aşkar edib. Maşında, həmçinin, İŞİD terror təşkilatının bayrağı tapılıb. Baş verənlər terror aktı kimi qiymətləndirilib. Federal müstəntiqlər hələlik Cabbarın tək hərəkət etdiyini düşünürlər, lakin onun əlaqələrini araşdırmağa davam edirlər. Terror hücumundan bir neçə gün sonra isə elə həmin küçədə terrorçunun yerləşdirdiyi iki əldəqayırma partlayıcı qurğu aşkarlanaraq zərərsizləşdirilib.
