ABŞ və İran nümayəndələri Hörmüz boğazından keçən gəmilərlə bağlı yarana biləcək problemlərin operativ həlli üçün xüsusi rabitə xətti yaradıblar.
Oxu.Az "İnterfax" agentliyinə istinadən xəbər verir ki, bu barədə İran parlamentinin sədri Məhəmmədbaqer Qalibaf açıqlama verib.
Qalibafın sözlərinə görə, yeni mexanizm münaqişəli vəziyyətlərin və mümkün insidentlərin qarşısının alınmasına xidmət edəcək.
Bundan əlavə, parlament sədri bildirib ki, İsveçrədə keçirilən son danışıqlarda Vaşinqton və Tehran 12 milyard dollar həcmində dondurulmuş İran aktivlərinin blokdan çıxarılması ilə bağlı razılığa gəliblər.
Qalibaf həmçinin qeyd edib ki, ABŞ və İran Livanın ərazi bütövlüyünün qorunmasına təminat verəcəklər.
Xatırladaq ki, iyunun 21-də İsveçrənin Bürgenştok şəhərində Qətər və Pakistanın vasitəçiliyi ilə ABŞ və İran arasında danışıqlar keçirilib. ABŞ nümayəndə heyətinə Cey. Di. Vens, Donald Trampın xüsusi nümayəndəsi Stiv Uitkoff və kürəkəni Cared Kuşner rəhbərlik edib. İran tərəfini isə parlamentin sədri Məhəmmədbaqer Qalibaf və xarici işlər naziri Abbas Əraqçi təmsil edib.
