Qara dənizdəki Xəzər Boru Kəməri Konsorsiumunun (CPC) dəniz terminalı ərazisində iki tanker pilotsuz uçuş aparatlarının (PUA) hücumuna məruz qalıb.
Oxu.Az-ın Qazaxıstanın Energetika Nazirliyinə istinadən verdiyi məlumata görə, iyulun 30-da VPU-3 təknöqtəli lövbərsalma məntəqəsində neftin yüklənməsini başa çatdıran "Nissos Sifnos" tankeri hücuma məruz qalıb. Hücum təhlükəsi səbəbindən yükləmə prosesi dayandırılıb.
Həmçinin, yüklənməsi planlaşdırılan "Marathi" tankerinə də CPC dəniz terminalından 6-7 dəniz mili məsafəsində dron hücumu edilib.
Əldə edilən məlumata görə, gəmi heyətləri, CPC və podratçı təşkilatların əməkdaşları arasında xəsarət alan olmayıb və neft dağılması baş verməyib. Alovlanma isə konsorsiumun üç yedək gəmisinin köməyi ilə söndürülüb.
Xatırladaq ki, bundan əvvəlki Ukrayna hücumundan sonra CPC iyulun 27-də tankerlərlə neftin nəqlini bərpa etmişdi. Qazaxıstanın neft ixracının 80 %-dən çoxu bu marşrutun payına düşür.
