Müqəddəs taxt-taca çıxan ilk amerikalı Papa XIV Leo bildirib ki, o, ABŞ vətəndaşı olmaqdan əvvəl, ilk növbədə, Roma katolik kilsəsinin rəhbəridir.
Oxu.Az xəbər verir ki, "NBC News" telekanalına verdiyi müsahibədə pontifikdən amerikalı olmağın onun üçün nə dərəcədə əhəmiyyət kəsb etdiyi soruşulub.
"Buna aydınlıq gətirmək istərdim - mən özümü, sadəcə olaraq, amerikalı kimi doğulmuş bir Papa hesab edirəm. Mən Birləşmiş Ştatlarda dünyaya gəlmişəm, ailəm hələ də orada yaşayır, Amerikanı çox sevirəm. Lakin mənim missiyamın çox önəmli bir tərəfi var: qlobal kilsənin rəhbəri olmaq və bütün dünyadakı insanlara müraciət edə bilmək", - deyə o vurğulayıb.
Bununla yanaşı, Roma Papası yaxın gələcəkdə ABŞ-yə səfər edə biləcəyini də istisna etməyib.
Xatırladaq ki, aprel ayında ABŞ Prezidenti Donald Tramp XIV Leonu sərt şəkildə tənqid edərək, pontifikin yalnız Birləşmiş Ştatlar sayəsində seçildiyini iddia edib. Tramp "Truth Social" platformasında yazmışdı ki, hazırkı Papanın namizədlər siyahısına salınmasının yeganə səbəbi onun amerikalı olmasıdır və kilsə Prezident Donald Trampla münasibət qurmağın ən yaxşı yolunun bu olacağını düşünüb.
