Rusiyanın Samara vilayətində qəribə sevgilisi ilə qaçan 16 yaşlı məktəbli qız yorğun, saçları qırxılmış, ağır psixoloji vəziyyətdə, stres halında aşkar edilib.
Oxu.Az xəbər verir ki, bu barədə kp.ru məlumat verib.
Hadisə iyunun 16-da baş verib. Qız məktəbdən qayıtdıqdan sonra anası ilə mübahisə edib. Buna səbəb yeniyetmənin dərslərinə səhlənkar yanaşması olub. Üstəlik, hər şey o qədər gözlənilməz olub ki, valideyni qızının telefonunu yoxlamaq qərarına gəlib. Qadın orada qızının Andrey adlı şəxslə qəribə yazışmalarını tapıb.
Qızın münasibətdə olduğu naməlum kişinin ondan çox böyük olduğu üzə çıxıb. Nəticədə, ana ilə qız arasında qalmaqal daha da alovlanıb və qız küçəyə qaçıb. Bir neçə dəqiqədən sonra ana qızının avtomobilə minərək getdiyini görüb. Bundan sonra məktəbli itkin düşüb.
Qadın dərhal polisə şikayət edib və jurnalistlərə müraciət edib. Lakin qızı qaçıran şəxs onu tanınmayacaq dərəcədə dəyişmək qərarına gəlib.
"Qızımın saçını kəsib, bütün zinət əşyalarını çıxarıb, sonra monastırdan əşyalar götürüb və onun paltarını dəyişib", - qızı tapıldıqdan sonra anası bildirib.
Eyni zamanda, məktəbli qızın həyatı əsl kabusa çevrilib. Güman edilir ki, kişi onu Sızran şəhərinə aparıb və orada əsl evsiz insanlar kimi yaşamalı olub. Yeniyetmə bir neçə həftə sonra Volqanın sahilindəki çimərlikdə tapılıb. Həmin vaxt qız daha çox zombiyə bənzəyib - o, xeyli arıqlamış və ciddi psixoloji sarsıntı vəziyyətində olub.
Qeyd olunur ki, məktəbli qız hazırda evdədir. Valideynləri qızın normal həyata qayıtması üçün onu psixoloqa göndəriblər. Öz növbəsində, qaçıran şəxs hələlik sərbəst buraxılıb. Qız özü maşına mindiyi üçün indiyədək ona qarşı ittiham irəli sürülməyib.
