Ukraynanın Xarkov şəhərində Rusiyanın PUA zərbələri nəticəsində dinc əhalinin həlak olması və yaralanması ilə əlaqədar matəm elan edilib.
Oxu.Az-ın xəbərinə görə, bu barədə şəhər meri İqor Terexov öz "Telegram" kanalında bildirib.
Öz növbəsində vilayət hərbi administrasiyasının rəisi Oleq Sinequbov bildirib ki, Rusiyanın sənaye rayonunu atəşə tutması nəticəsində ümumilikdə altı uşaq yaralanıb.
"Beş nəfər həlak olub və onlardan ikisi uşaqdır. Beşinci qurban qadındır, onunla bağlı təfərrüat dəqiqləşdirilir", - deyə o "Telegram" kanalında yazıb.
Rusiya pilotsuz təyyarələri Ukraynanın Xarkov şəhərində yaşayış binasını vurub. Hücum nəticəsində biri uşaq olmaqla dörd nəfər həyatını itirib.
Bu barədə Oxu.Az Ukrayna KİV-ə istinadən xəbər verir.
Məlumata görə, zərbə nəticəsində binanın birinci, üçüncü və beşinci mərtəbələrindəki mənzillərdə yanğın baş verib. Binanın tavanı uçub.
Ümumilikdə, altı yaşayış binasına və 15 avtomobilə ziyan dəyib.
Şəhərin meri İqor Terexov qeyd edib ki, dağıntılar altında hələ də insanlar var, onların sayı dəqiqləşdirilir.
"Evin dağıntıları altından daha bir insanın cəsədi tapılıb. Beləliklə, ölənlərin sayı artıq dördə çatıb ki, onlardan biri uşaqdır", - deyə o bildirib.
Axtarış-xilasetmə əməliyyatı davam edir.
