Nyu-York ştatının dairə məhkəməsi 27 yaşlı Nyu-Cersi sakini Hadi Matarı hindəsilli ingilis yazıçısı Salman Rüşdiyə hücum etməkdə ittiham edərək 25 il azadlıqdan məhrum edib.
Oxu.Az "The Guardian"a istinadən xəbər verir ki, məhkəmə prosesi 10 fevralda başlayıb. 21 fevralda məhkəmə heyəti Matarı qətl cəhdində təqsirli hesab edib.
Qeyd edək ki, Matar Livandan ABŞ-yə köçən ailədə anadan olub. O, Nyu-Cersidə yaşayıb və geyim mağazasında işləyib. Onu tənha adam kimi təsvir ediblər.
2018-ci ildə Yaxın Şərqdən qayıtdıqdan sonra gənc İslam dini ilə daha çox maraqlanmağa başlayıb.
2022-ci il avqustunda Matar Nyu-Yorkdakı təhsil mərkəzində Rüşdiyə hücum edib. O, yazıçıya 15 bıçaq zərbəsi endirib. Rüşdi hücum nəticəsində sağ gözünü itirib.
ABŞ Ədliyyə Nazirliyinin versiyasına görə, Matar yazıçını öldürməyə çağıran fətvanı yerinə yetirmək üçün hücum edib. 1989-cu ildə bu fətvanı İran ayətullahı Ruhulla Xomeyni verib. Fətvanın səbəbi isə Rüşdinin 1988-ci ildə yazdığı "Şeytan ayələri" romanı olub ki, onu Məhəmməd peyğəmbərə satira kimi qiymətləndiriblər.
