Tacikistandakı güclü zəlzələ nəticəsində üç yaşlı uşaq həlak olub

Tacikistanda baş vermiş güclü zəlzələ nəticəsində üç yaşlı uşaq həlak olub.

Oxu.Az bu barədə Tacikistan hökuməti yanında Fövqəladə Hallar və Mülki Müdafiə Komitəsinin Böhranlı Vəziyyətləri İdarəetmə Mərkəzinin məlumatına istinadla xəbər verir.

Bildirilir ki, Rəşt rayonunun kəndlərinin birində yaşayış evinin divarının uçması nəticəsində uşaq dağıntılar altında qalaraq həlak olub.

Qeyd edək ki, Tacikistan ərazisində gün ərzində iki zəlzələ baş verib. Birincisi 5.9, ikincisi isə 4.5 maqnitudalı olub.

11:42

Tacikistanda baş vermis 5.9 maqnitudalı zəlzələ nəticəsində 17 yaşayış evi və bir məktəb qismən dağılıb.

Oxu.Az bu barədə Tacikistan hökuməti yanında Fövqəladə Hallar və Mülki Müdafiə Komitəsinin Böhranlı Vəziyyətləri İdarəetmə Mərkəzinin məlumatına istinadla xəbər verir.

Bildirilir ki, yeraltı təkanların episentri Rəşt rayonu olub. Orada zəlzələnin gücü 5 bal, paytaxt Düşənbədə isə 4 bal təşkil edib.

Qeyd edək ki, yeraltı təkanlar qonşu ölkələrdə də hiss edilib.

09:48

Tacikistanda 5.9 maqnitudalı zəlzələ qeydə alınıb.

Oxu.Az bu barədə Avropa-Aralıq dənizi Seysmoloji Mərkəzinin məlumatına istinadla xəbər verir.

Onun məlumatına görə, yeraltı təkanların episentri Xücənd şəhərindən 170 kilometr cənubda yerləşib.

Zəlzələnin ocağı 15 kilometr dərinlikdə olub.

Düşənbənin mərkəzində bir neçə saniyə ərzində zəif təkanlar hiss olunub.

Zərərçəkənlər və dağıntılar barədə məlumat daxil olmayıb.