Qondarma erməni soyqırımı ilə bağlı tədbiri ləğv etdirən tələbələrimiz DANIŞDILAR

Amerikada təhsil alan tələbə gənclər ermənilərin növbəti təxribatının qarşısını alıblar. Onlar bu addımları ilə Hüquq fakültəsində aldıqları təhsilin hədər getmədiyini isbat ediblər.

Oxu.Az Xəzər TV-yə istinadən məlumat verir ki, Berkli Kaliforniya Universitetinin hüquq fakültəsində, qondarma "erməni soyqırımı"nın anım günündə, İkinci Qarabağ müharibəsi ilə bağlı ermənilərin lentə aldığı filmin nümayiş etdirilməsi nəzərdə tutulub.

Həmin universitetdə magistr təhsili alan azərbaycanlı tələbələr, Ceyhun Xəlilov, İnqilab Hüseynzadə və Murad Qurbanov isə tədbirin ləğv olunmasına nail olublar.

Onlar bildiriblər ki, bu tədbirin keçirilməsində bizi narahat edən iki əsas məqam var idi. Belə ki, həmin tədbirin təsvir hissəsində "Arsax" ifadəsi işlənilib. Bu isə 24 aprel - ermənilər üçün iddia edilən "Soyqırımı anma günü"nə təsadüf edib.

Azərbaycanlı tələbələrin sözlərinə görə, məsələni universitet rəhbərliyinə bildiriblər.

Rəhbərlik isə etirazlarımızda haqlı olduğumuzu bildirdi. Əlavə olaraq isə "Arsax" ifadəsi təsvirdən çıxarıldı.

Həmçinin gənclər bu tədbirin keçirilməsini Azərbaycanı birbaşa soyqırımında günahlandırmaq olduğunu diqqətə çatdırıblar.

Ətraflı süjetdə:

Qondarma erməni soyqırımı ilə bağlı tədbiri ləğv etdirən tələbələrimiz DANIŞDILAR

24 aprel, 09:58

ABŞ-də təhsil alan azərbaycanlı tələbələr qondarma erməni soyqırımının "anım günü"ndə İkinci Qarabağ müharibəsi ilə bağlı ermənilərin lentə aldığı filmin nümayişinin qarşısını alıblar.

Oxu.Az xəbər verir ki, bu barədə Berkli Kaliforniya Universitetinin hüquq fakültəsində magistr təhsili alan Ceyhun Xəlilov sosial şəbəkə hesabında paylaşım edib.

Həmin paylaşımı təqdim edirik:

"Aprelin 24-ü Berkli Kaliforniya Universitetinin hüquq fakültəsində qondarma erməni soyqırımının "anım günü"ndə İkinci Qarabağ müharibəsi ilə bağlı ermənilərin lentə aldığı filmin nümayiş etdirilməsi nəzərdə tutulurdu. Bunu görən kimi bazar ertəsi digər magistr tələbələri İnqilab Hüseynzadə və Murad Qurbanovla "LLM Advising Office"ə (universitetin magistr mərkəzi) yollandıq. Münaqişənin tarixi, 1905-ci ildən bəri Azərbaycan xalqının məruz qaldığı sistematik qırğınlar, BMT-nin dörd qətnaməsi, Xocalı soyqırımı və ən əsası - hazırda davam edən sülh danışıqlarından söz açdıq. Ermənilərin tədbirinin Azərbaycanı birbaşa soyqırımında günahlandırdığını diqqətlərinə çatdırdıq. Əlavə olaraq, tədbirin təsviri hissəsində "arts**h" sözünün işlədilməsinin bizim ərazi suverenliyimizə birbaşa zidd olduğunu bildirdik.

Növbəti gün "Advising Office"in rəhbəri hər üçümüzü şəxsən qəbul edərək uzun müzakirə apardı. Qeyd etdi ki, tədbir kifayət qədər "offensive"də olsa, insanların sağlamlığı üçün ciddi təhdidlər də olsa, bütün deyilənlər yalan da olsa, ABŞ Konstitusiyasının 1-ci əlavəsinə əsasən, heç kimin tədbiri ləğv etmək hüququ yoxdur. Bu halda biz də Azərbaycana qarşı baş verən qırğınlar, habelə Vətən müharibəsi dövründə Gəncə və Bərdəyə olan hücumlarla bağlı stend açmaq istədiyimizi dedik.

Daha sonra tədbirin təşkilatçısı olan İnsan Hüquqları Mərkəzinin direktor müavini ilə bu məsələni müzakirə etdik. Bütün narazılıqlarımızı və etirazlarımızı bildirdik. Qeyd etdik ki, hüquq fakültəsində dərs deyən Beynəlxalq Ədalət Məhkəməsinin köhnə sədri, hakim Coan Donahyu belə qeyd edir ki, münaqişə artıq bitib. Və bu tədbirin keçirilməsi yalnız provokativ xarakter daşıyır. Sülh danışıqlarına xələl gətirir.

Nəticədə əvvəlcə qondarma qurumun tarixin ən qaranlıq nöqtəsinə göndərilmiş adı silindi. Direktor müavini isə bildirdi ki, tədbir başlamazdan əvvəl özü şəxsən təkzib verərək bu tədbirin qondarma hadisələrin "anım günü"nə heç bir aidiyyəti olmadığını bildirəcək.

Və bu gün artıq tədbir ləğv edildi. Ola bilsin, onlar bu filmi başqa vaxt başqa yerdə nümayiş etdirəcəklər, bizim də bunun qarşısını almağa gücümüz çatmayacaq. Amma bu gün qarşısını ala bildik".

Qeyd edək ki, hər üç tələbə ötən il "Gənclərin xarici ölkələrin nüfuzlu ali təhsil müəssisələrində təhsil almalarına dair 2022-26-cı illər üçün Dövlət Proqramı" çərçivəsində tam təqaüd qazanmaqla ABŞ-nin nüfuzlu Berkli Kaliforniya Universitetinin hüquq üzrə magistratura pilləsinə qəbul olublar.