Tramp Administrasiyası FTB baş qərargahının binasının satışı ilə bağlı son qərarını açıqladı

ABŞ-nin Federal Təhqiqatlar Bürosunun (FBI) qərargahı, Ədliyyə Nazirliyi, Federal Mülki Aviasiya İdarəsi və bir sıra digər federal qurumların binaları Ümumi Xidmətlər İdarəsinin (GSA) satışa çıxarıla biləcək daşınmaz əmlakları siyahısından çıxarılıb.

Oxu.Az bu barədə "Bloomberg"ə istinadla xəbər verir.

Bildirilir ki, siyahı əvvəlki 443 obyektlik versiyadan 320 obyektə qədər azaldılıb.

Bundan əlavə, Kənd Təsərrüfatı, Səhiyyə, Əmək və Veteranlar İşləri Nazirliklərinin kompleksləri də siyahıdan çıxarılıb. Şimali Virciniyada yerləşən və rəsmi olaraq federal mülkiyyət siyahısında qeyd olunmayan, lakin Mərkəzi Kəşfiyyat İdarəsi ilə əlaqələndirilən binalar kompleksi də siyahıdan çıxarılıb. Həmçinin ABŞ Okean və Atmosfer Tədqiqatları Milli İdarəsinə məxsus meteoroloji peyklərə nəzarət obyekti, eləcə də Qida və Dərman Administrasiyasının laboratoriya kompleksi satış siyahısından çıxarılıb.

15:16

ABŞ Ümumi Xidmətlər Administrasiyası (GSA) federal hökumətə aid satışa çıxarılacaq əmlakların siyahısını dərc edib. Onların arasında Federal Təhqiqatlar Bürosu (FTB) və Ədliyyə Nazirliyinin baş qərargahları da var.

Oxu.Az-ın məlumata görə, bu barədə TASS xəbər verib.

Bildirilir ki, siyahıda 440-dan çox obyekt (qarajlar, ofis binaları, şəhərkənarı evlər və digər daşınmaz əmlaklar) yer alır. Administrasiya tərəfindən verilən açıqlamada bu əmlakların dövlətin işində vacib rol oynamadığı qeyd edilib.

"Onların satışı, vergi ödəyicilərinin dollarlarının artıq boş və ya az istifadə olunan federal qurumların binalarına xərclənməməsini təmin edəcək", - deyə açıqlamada vurğulanıb.

Qeyd edək ki, Edqar Huverin (1924-1972-ci illərdə FTB-nin direktoru olub) adı ilə tanınan bina 1975-ci ildə inşa edilib və həmin vaxtdan etibarən büronun baş qərargahı olub. ABŞ Ədliyyə Nazirliyi isə 1935-ci ildə inşa edilmiş və 110 min kvadrat metr sahəsi olan binada yerləşir.

Həmçinin siyahıda 1899-cu ildə neoroman üslubunda inşa edilmiş tarixi baş poçt binası, ABŞ Qızıl Xaç Cəmiyyətinin baş qərargahı, Əmək Nazirliyi, ABŞ Mənzil və Şəhərsalma Nazirliyinin binaları da yer alır.