ABŞ Konqresi Senatının Ədliyyə komitəsi Prezident Donald Tramp tərəfindən ölkənin ədliyyə naziri - baş prokuroru postuna irəli sürülən Todd Blanşın namizədliyinin təsdiqlənməsi üzrə səsverməni qeyri-müəyyən müddətə təxirə salıb.
Bu barədə Oxu.Az TASS-a istinadən xəbər verir.
Sözügedən səsvermənin keçirilməli olduğu iclas iyulun 30-u Bakı vaxtı ilə saat 17:00-a təyin edilmişdi. Hazırda isə komitənin rəsmi səhifəsində bu görüşün ertələndiyi bildirilir.
Xatırladaq ki, Tramp aprel ayında Blanşı ABŞ Ədliyyə Nazirliyinin rəhbəri səlahiyyətlərini icra edən şəxs təyin edib. İyun ayında isə Ağ Ev lideri onu daimi əsasda ədliyyə naziri - baş prokuror vəzifəsinə namizəd göstərib. Blanşın bu posta təsdiqlənməsi üçün onun namizədliyi əvvəlcə Senatın Ədliyyə komitəsi, ardınca isə Konqresin yuxarı palatası tərəfindən tam tərkibdə dəstəklənməlidir.
"The Hill" nəşrinin məlumatına görə, səsvermə prosesi Senatın Ədliyyə komitəsində təmsil olunan bir qrup respublikaçının qərarı ilə dayandırılıb. Onlar Vaşinqton Administrasiyasından Trampın dediyinə görə, 46-cı prezident Co Baydenin dövründə ABŞ hakimiyyətinin səlahiyyətlərindən sui-istifadə etməsi nəticəsində zərər çəkmiş şəxslərə təzminat ödəmək üçün təxminən 1.8 milyard dollar dəyərində fondun yaradılmayacağına dair yazılı zəmanət tələb edirlər. Bir çox qanunvericilər vergi ödəyicilərinin vəsaitlərinin bu cür xərclənməsini məqsədəuyğun hesab etməyiblər.
