"Wi-Fi"dan təhlükəsiz istifadə qaydaları açıqlanıb

Mobil trafikin qənaəti və evdən çıxarkən "Wi-Fi"ı söndürməmək vərdişi - smartfonun kibercanilərin hədəfinə çevrilməsinin iki səbəbidir.

Oxu.Az bu barədə iz.ru-ya istinadən xəbər verir.

Bu sahə üzrə rusiyalı ekspert Aleksandr Qolubçikovin sözlərinə görə, ümumi istifadədə olan "Wi-Fi"la bağlı ən ciddi kibertəhdidlərdən biri vasitəçi hücumlarıdır. Bu hallarda cinayətkarlar cihazınızla "Wi-Fi" giriş nöqtəsi arasında olaraq məlumatları ələ keçirə bilərlər.

"Kibercanilərin parollar və kart nömrələri kimi məxfi məlumatları oxuması, dəyişdirməsi və ya hətta oğurlaması mümkündür. Hər kəs ümumi "Wi-Fi" şəbəkəsinə qoşula bildiyindən, internetdə məlumatlarınızı kimin izləyə və ya ələ keçirə biləcəyini dəqiq müəyyən etmək mümkün deyil", - deyə Qolubçikov bildirib.

Hakerlər, həmçinin ümumi "Wi-Fi" şəbəkələrində istifadəçi trafikini ələ keçirmək və izləmək üçün xüsusi proqram təminatından istifadə edə bilərlər. Bu onlara giriş məlumatları kimi məxfi data toplamağa imkan verir.

Ekspertin qeyd etdiyi üçüncü təhdid kibercanilərin yaratdığı saxta "Wi-Fi" şəbəkələridir. Bu şəbəkələr həqiqi kimi görünür, lakin əslində məlumatları oğurlamaq üçün nəzərdə tutulub. Onlara qoşularaq siz bilmədən məlumatlarınızı açıqlayırsınız.

Ekspert ictimai "Wi-Fi" şəbəkələrində məlumatlarınızı qorumaq üçün ümumi istifadədə olan "Wi-Fi"a qoşulduğunuz zaman bank əməliyyatları və ya onlayn alış-veriş kimi məxfi əməliyyatlardan çəkinməyi məsləhət görür. Əgər oxşar adlı bir neçə giriş nöqtəsi görürsünüzsə (məsələn, "restaurantguest", "restaurantfree" və s.), hansı şəbəkədən istifadə etməyin daha yaxşı olduğunu müəssisənin işçilərindən soruşun. Həmçinin hərəkət zamanı smartfonunuzda "Wi-Fi" funksiyasını daim açıq saxlamaq məsləhət görülmür, çünki bu, xəbəriniz olmadan təhlükəsiz olmayan şəbəkələrə avtomatik qoşulmaya səbəb ola bilər.

Bundan əlavə, ekspert cihazları və proqram təminatını mütəmadi olaraq yeniləməyi, ən son təhlükəsizlik yamaqlarını quraşdırmağı və cihazı onlayn təhdidlərdən qorumağı tövsiyə edir.