Yaponiyanın "Mitsubishi Heavy Industries" və NEC şirkətləri müdafiə sahəsində strateji tərəfdaşlığa dair memorandum imzalayıblar.
Oxu.Az xəbər verir ki, şirkətlər çərçivə sazişi əsasında pilotsuz sistemlərin, əməliyyatların planlaşdırılması, eləcə də idarəetmə və nəzarət sistemlərinin hazırlanması istiqamətində birgə çalışacaqlar.
Əməkdaşlıq Yaponiyanın müdafiə-sənaye bazasının gücləndirilməsinə, həmçinin məlumat və süni intellekt sahəsində ölkənin suverenliyinin təmin edilməsinə yönəlib. Şirkətlər müdafiə sahəsində pilotsuz sistemlərdən və süni intellektdən istifadənin genişlənməsi fonunda əməkdaşlığı gücləndirməyi planlaşdırırlar.
"Mitsubishi Heavy Industries" və NEC, həmçinin müdafiə avadanlıqlarının bulud texnologiyaları ilə inteqrasiyası çərçivəsində yeni idarəetmə və nəzarət sistemlərinin hazırlanmasında iştirak etməyi planlaşdırırlar.
Şirkətlər Yaponiyanın müdafiə imkanlarının gücləndirilməsinə və transformasiyasına yönəlmiş yüksək etibarlı məhsul və xidmətlər təqdim etmək üçün öz üstünlüklərindən istifadə edəcəklər.
