Yunanıstanda Qərbi Nil qızdırmasına yoluxma səbəbindən azı 24 nəfər həyatını itirib.
Oxu.Az-ın xəbərinə görə, bu barədə EFE agentliyi Yunanıstan Milli Səhiyyə Təşkilatına istinadən məlumat verib.
Bildirilib ki, ötən cümə axşamından bəri 58 yeni yoluxma halı qeydə alınıb. İlin əvvəlindən bəri yoluxanların ümumi sayı isə 290-a çatıb, 32 xəstə reanimasiyadadır.
Yoluxma hallarının təxminən yarısı Şərqi Attikanın (Yunanıstanın cənubu), eləcə də Afinanın şimal ətraflarının payına düşür. Ümumilikdə virus artıq Yunanıstanın 13 bölgəsindən 6-na yayılıb.
Yunan mütəxəssislər hesab edirlər ki, yaxın həftələrdə virus yayılmağa davam edəcək, çünki məhz sentyabr ayında adətən yoluxma hallarının sıçrayışı müşahidə olunur.
Qeyd edək ki, Qərbi Nil kəskin yoluxucu (infeksion) xəstəlikdir və bu xəstəliyin daşıyıcıları ağcaqanadlardır. Şiddətli baş və əzələ ağrısı ilə xarakterizə olunur, tez-tez qusma halı da baş verir. Həmçinin yuxululuq da müşahidə edilə bilər.
