120 milyon insan turizm sahəsində işini itirə bilər

Dünyada turizm sahəsində 120 milyon işçi koronavirus pandemiyasına görə tətbiq edilən qadağalar səbəbindən işsiz qala bilər.

“RİA Novosti” bu barədə BMT (Birləşmiş Millətlər Təşkilatı) baş katibi Antonio Quterreşin açıqlamasına istinadla xəbər yayır.

“Yer üzündə insanların hər on nəfərdən biri turizm sektorunda çalışır və bu sektor yüz milyonlarla insanın dolanışığını təmin edir”, - deyə Quterreş qeyd edib.

O, əlavə edib ki, pandemiya turizm sənayesini məhv edir.

Quterreş işçilərinin əsasını qadınların və gənclərin təşkil etdiyi mikro, kiçik və orta müəssisələrin xüsusilə risk altında olduğunu bildirib.

BMT-nin məlumatına görə, turistlərin sayı 2020-ci ildə ötən ilə nisbətən 58-78% azala bilər ki, bu da ziyarətçi xərclərinin 2019-cu ildəki 1,5 trilyon dollar səviyyəsindən 310-570 milyard dollaradək azalmasına səbəb olacaq.