Ağdam rayonunda Dövlət Su Ehtiyatları Agentliyinin əməkdaşlarına hücum edən şəxs həbs edilib.
Oxu.Az-ın məlumatına görə, hadisə rayonun Quzanlı qəsəbəsində baş verib. Dövlət Su Ehtiyatları Agentliyinin əməkdaşları qəsəbə sakini Rahil Murtuzayev istifadə etdiyi suyun pulunu ödəmədiyi üçün onun ünvanına gələrək, abonentə verilən su xəttini kəsmək istəyiblər. Bu vaxt məsələdən xəbər tutan R.Murtuzayevin yeznəsi İsmət Əliyev (soyadı şərtidir) əraziyə gələrək agentlik əməkdaşlarına mane olub. O, qurum əməkdaşlarını təhqir edərək onlara hücum çəkib.
Problemi aradan qaldırmaq üçün agentlik əməkdaşları əraziyə polis əməkdaşlarını çağırıblar. Polis əməkdaşları hadisə yerinə gələrək İsməti sakitləşdirmək istəsələr də, o, heç nəyə məhəl qoymadan hərəkətlərinə davam edib. Vətəndaş onları qorxutmaq üçün Daxili İşlər Nazirliyinin "102" xidmətinə zəng vuraraq guya özünün və qaynının polis əməkdaşları tərəfindən döyüldüyünü bildirib.
Faktla bağlı araşdırma başlanılıb və İsmət Əliyevlə Rahil Murtuzayev müayinə üçün xəstəxanaya aparılıb. Müayinə zamanı İ.Əliyev və R.Murtuzayevin üzərində heç bir xəsarət izi aşkar edilməyib, İ.Əliyevin polisə yalan məlumat verdiyi üzə çıxıb. Hadisə zamanı İ.Əliyev xəstəxananın pəncərəsinin şüşələrini də qırıb. O, polis əməkdaşları tərəfindən saxlanılaraq barəsində inzibati protokol tərtib edilib və iş məhkəməyə göndərilib.
Məhkəmənin qərarı ilə İ.Əliyev 10 sutka inzibati qaydada həbs edilib.
Samir Əli
