Ağdaşda baş vermiş bədbəxt hadisənin təfərrüatı məlum olub.
Belə ki, 59 yaşlı İmadəddin Əbdülrəhimov binanın tavan hissəsində işləyərkən müvazinətini itirib və yıxılıb.
Ağır bədən xəsarətləri alan yaralı ətrafdakı insanların köməyi ilə dərhal Ağdaş Rayon Mərkəzi Xəstəxanasına çatdırılsa da, onun həyatını xilas etmək mümkün olmayıb.
"Səs-küy gəldi, yaxınlaşdıq, qanın içində idi. Yaxşı kişi idi, buranın sakini deyildi. Çayxana işlədirəm, buraya çay içməyə gələrdi", - deyə hadisə şahidi bildirib.
Ətraflı Baku TV-nin süjetində:
Ağdaşda ağır xəsarət almış şəxs xəstəxanada vəfat edib.
Tibbi Ərazi Bölmələrini İdarəetmə Birliyindən (TƏBİB) Oxu.Az-ın sorğusuna cavab olaraq verilən məlumata görə, iyunun 12-si saat 09:40-da 1 nəfər (kişi cinsli) Ağdaş Rayon Mərkəzi Xəstəxanasının Təcili tibbi yardım bölməsinə hospitalizasiya olunub.
"1966-cı il təvəllüdlü şəxsə sağ saidin yuxarı üçdə birinin açıq yerdəyişən sınığı, döş qəfəsinin çoxsaylı sınıqları, qarın boşluğunun küt travması və travmatik şok diaqnozları qoyulub. Vəziyyəti ağır qiymətləndirilərək Reanimasiya şöbəsinə yerləşdirilib.
Lakin göstərilən bütün reanimasiya tədbirlərinə və həkimlərin çoxsaylı səylərinə baxmayaraq, saat 15:00-da ölüm faktı qeydə alınıb.
Meyit Məhkəmə Tibbi Ekspertiza və Patoloji Anatomiya Birliyinin Ağdaş rayon şöbəsinə təhvil verilib", - məlumatda bildirilib.
Ağdaş rayon Mədəniyyət Evində ölümlə nəticələnən hadisə baş verib.
Oxu.Az-ın məlumatına görə, hadisə Mədəniyyət Evində aparılan təmir işləri zamanı baş verib. Orada usta işləyən 1966-cı il təvəllüdlü İmadəddin Əbdülrəhimov binanın damında işləyərkən ehtiyatsızlıqdan yıxılıb. O, xəstəxanaya çatdırılsa da, həyatını xilas etmək mümkün olmayıb. İ.Əbdülrəhimov aldığı xəsarətlərdən orada dünyasını dəyişib.
Faktla bağlı araşdırma aparılır.
Samir Əli
