"BakuBus"ın 10 nömrəli marşrut xəttindəki avtobusun ağaca çırpılması zamanı xəsarət alan şəxs evə buraxılıb.
Bu barədə Oxu.Az-a Kliniki Tibbi Mərkəzdən (KTM) bildirilib.
"4 mart 2025-ci il tarixində 1 nəfər (qadın cinsli) şəxs bədənin müxtəlif hissələrinin səthi travması diaqnozu ilə Kliniki Tibbi Mərkəzin Təcili və Təxirəsalınmaz Tibbi Yardım şöbəsinə qəbul olunub.
Ona zəruri tibbi xidmətlər göstərilib. Vəziyyəti qənaətbəxş qiymətləndirilib və ambulator müalicə üçün evə buraxılıb" , - məlumatda qeyd edilib.
"BakuBus"ın 10 nömrəli marşrut xəttindəki avtobusun ağaca çırpılmasına səbəb ehtiyatsızlıq olub".
Bunu Oxu.Az-a açıqlamasında "BakuBus" MMC-nin mətbuat katibi Əsmər Əliyeva deyib.
O bildirib ki, ilkin məlumata görə, hadisə nəticəsində avtobusda olan 3 sərnişin yüngül xəsarət alıb:
"Bu gün saat 7:10-da "BakuBus" MMC-nin balansında olan 10 nömrəli marşrut xətti üzrə hərəkət edən 77-JA-658 dövlət qeydiyyat nişanlı avtobus Nazim Hikmət küçəsi, 73 ünvanında (Mirəli Seyidov küçəsi ilə kəsişmədə) hərəkətdə olarkən yol kənarındakı ağaca çırpılıb. Nəticədə ağac qırılaraq dayanacaqda dayanan 90-TE-377 dövlət qeydiyyat nişanlı avtomobilin üzərinə aşıb.
İlkin məlumata əsasən, nəqliyyat vasitəsinin sürücüsü Şəhriyar Məcidzadə ehtiyatsızlıq səbəbindən idarəetməni itirib və nəticədə avtobus yoldan çıxaraq ağaca çırpılıb. Hadisə nəticəsində avtobusda olan 3 sərnişin yüngül xəsarət alıb və dərhal təcili tibbi yardım avtomobilinin vasitəsilə 1 saylı Klinik Xəstəxanaya aparılaraq ilkin tibbi müdaxilə edilib, hazırda onların vəziyyəti normaldır.
Hadisə ilə bağlı aidiyyəti qurumlara məlumat verilib və hazırda araşdırma aparılır".
Bakı şəhəri, Yasamal rayonunda yol-nəqliyyat hadisəsi baş verib.
Oxu.Az xəbər verir ki, Yasamal rayonu, Mirəli Seyidov küçəsi ilə Qəzənfər Musabəyov parkının yaxınlığından keçərkən "BakuBus" MMC-yə məxsus 10 nömrəli marşrut xəttinin avtobusu ağaca çırpılıb.
Sözügedən hadisə nəticəsində ağacın qarşısında duran avtomobilə zərər dəyib.
Hadisə yerindən görüntüləri təqdim edirik:
Aygün Mirakif
