"Bakının Nizami rayonu, Əli Vəliyev küçəsində partlayış baş vermiş binanın bərpası müddətində birinci girişdəki 15 mənzilin sakinlərinin müvəqqəti yaşayışı üçün kirayə haqları ödəniləcək".
Bunu Oxu.Az-a açıqlamasında Fövqəladə Hallar Nazirliyinin (FHN) Tikintidə Təhlükəsizliyə Nəzarət Dövlət Agentliyinin rəis müavini Elxan Əsədov deyib.
O qeyd edib ki, sözügedən binada, ilkin ehtimala görə, qaz sızması nəticəsində partlayış baş verib.
Rəis müavini əlavə edib ki, hadisə beşmərtəbəli binanın sonuncu mərtəbəsində, birotaqlı mənzildə baş verib:
"Binanın birinci girişinin dörd və beşinci mərtəbələri qəzalı vəziyyətə düşüb. Həmin mərtəbələr sökülüb və yenidən bərpa ediləcək. Yaxın müddətdə hökumət bununla bağlı müvafiq qərar qəbul edəcək. Layihə, smeta sənədləri hazırlanacaq, binanın bərpa işlərinə başlanılacaq".
Avqustun 28-də saat 06:10-da Bakı şəhəri, Nizami rayonu, Əli Vəliyev küçəsində yaşayış binasında partlayış baş verməsi səbəbi ilə Respublika Təcili və Təxirəsalınmaz Tibbi Yardım Mərkəzinə çağırış daxil olub.
Bu barədə Oxu.Az-ın sorğusuna cavab olaraq Tibbi Ərazi Bölmələrini İdarəetmə Birliyindən (TƏBİB) məlumat verilib.
Məlumatda qeyd olunub ki, çağırış əsasında təcili tibbi yardım briqadası ünvana cəlb olunub:
"Təcili tibbi yardım briqadasına ikisi uşaq olmaqla, ümumilikdə dörd nəfərin (biri qadın, üçü kişi cinsli) müraciəti qeydə alınıb.
Onların hər birinə təcili tibbi yardım briqadası tərəfindən yerinə ilkin tibbi yardım göstərilib".
"Partlayış səhər saat 5 radələrində olub. Yatmışdım, partlayışın gücündən şkaflar başıma aşıb. Otaqdan çıxanda gördüm. Stul başımı əzib. FHN-in əməkdaşları o vəziyyətdə məni xilas ediblər".
Bu sözləri Oxu.Az-a açıqlamasında Bakı şəhəri, Nizami rayonu, Əli Vəliyev küçəsindəki beşmərtəbəli binada partlayış baş vermiş mənzildə yaşayan sakin Teymur Musa oğlu Muqamov deyib.
O qeyd edib ki, başının sağ tərəfi əzilib:
"Bir az başımda keylik var, yenə gedib yoxlanacağam".
T.Muqamov əlavə edib ki, yaşadığı mənzildə qaz bağlı idi:
"Gecə 1-də yerə döşək atıb yatmışdım. Təkcə soyuducu taxılı idi. Partlayışın hansı səbəbdən baş verdiyini bilmirəm".
"Blokdakı partlayış səsinə oyandım, çox qorxulu idi. Qonşular qışqırırdılar ki, çıx çölə, partlayış olub. Xalat geyinib, aşağı qaçdım. Hər yeri su basmışdı".
Bu sözləri Oxu.Az-a açıqlamasında Bakı şəhəri, Nizami rayonu, Əli Vəliyev küçəsindəki beşmərtəbəli binada partlayış baş vermiş mənzilin sahibəsi Alevtina Kərimova deyib.
O, baş verənləri belə xatırlayıb:
"Mən dördüncü mərtəbədə yaşayıram, partlayış isə beşinci mərtəbədə olub. Həmin mənzildə dördnəfərlik ailə kirayə qalırdı, ev isə mənə məxsusdur. Kişinin həyat yoldaşı və iki uşağı rayona istirahətə getmişdilər, evdə təkcə özü qalmışdı. O, ciddi xəsarət alıb və xəstəxanaya aparılıb. Partlayış o qədər güclü olub ki, kişini dama tullayıb. Evin tavanı dağılıb, səma görünür".
A.Kərimova bildirib ki, partlayışın hansı səbəbdən baş verdiyini bilmir:
"Evimdə üç gündür qaz yoxdur. O evdə qalan kişi də deyirdi ki, qaz işlətmir".
Məhərrəm Əliyev
Bakıda mənzildə baş verən partlayışda bir nəfər xəsarət alıb.
Oxu.Az Fövqəladə Hallar Nazirliyinin məlumatına istinadən xəbər verir ki, qurumun Dövlət Yanğından Mühafizə və Xüsusi Riskli Xilasetmə xidmətlərinin qüvvələri Nizami rayonu, Əli Vəliyev küçəsində hadisə yerində əməliyyat şəraitini qiymətləndirən zaman beşmərtəbəli yaşayış binasının beşinci mərtəbəsində yerləşən birotaqlı mənzildə yanğınla müşayiət olunmayan partlayışın baş verdiyini və vətəndaşın müxtəlif dərəcəli bədən xəsarətləri alaraq köməksiz vəziyyətdə qaldığını müəyyən ediblər.
FHN-in qüvvələri tərəfindən həyata keçirilən operativ xilasetmə əməliyyatı sayəsində vətəndaş, 1987-ci il təvəllüdlü Teymur Musa oğlu Muqamov xilas edilərək təcili tibbi yardım briqadasına təhvil verilib.
Təhlükəsizlik tədbirləri çərçivəsində qonşu mənzillərin sakinləri təxliyə ediliblər.
Hadisə ilə əlaqədar aidiyyəti qurumlar tərəfindən araşdırma aparılır.
Bakıda beşmərtəbəli yaşayış binasında partlayış olub.
Oxu.Az bu barədə Fövqəladə Hallar Nazirliyinin (FHN) məlumatına istinadla xəbər verir.
Bildirilir ki, hadisə Nizami rayonu, Əli Vəliyev küçəsində yerləşən binanın mənzillərindən birində baş verib.
Məlumatla əlaqədar dərhal əraziyə FHN-in Dövlət Yanğından Mühafizə və Xüsusi Riskli Xilasetmə xidmətlərinin qüvvələri cəlb olunub.
Əlavə məlumat veriləcək.
