Yasamal rayonunun İnşaatçılar prospektində yaşayış binalarından birinin zirzəmisinə çirkab suların toplanmasının səbəbi məlum olub.
Oxu.Az-ın sorğusuna İri Şəhərlərin Birləşmiş Su Təchizatı Xidmətindən verilən cavabda bildirilib ki, zirzəmiyə suyun dolmasına səbəb tullantı su xəttinin tutulması olub.
Qeyd edilib ki, vətəndaşların vaxtaşırı xətlərə məişət tullantılarını atması nəticəsində tullantı su xətləri tutulub.
"Sakinlərdən xahiş olunur ki, kanalizasiya şəbəkəsinə tullantı suyundan kənar əşyalar, məişət tullantıları (salfet, yağ qalıqları və s.) atmasınlar. Həmçinin ərazidə hər hansı tutulma baş verən zaman müvafiq sukanal idarəsinin qəza briqadası ünvana cəlb olunur və tutulma aradan qaldırılır".
Həmçinin qurumdan bildirilib ki, məsələ ilə bağlı sukanal idarəsi məlumatlıdır, zirzəmidən suyun çəkilməsi təmin ediləcək:
"Bir daha qeyd edək ki, kanalizasiya xətti yalnız tullantı su axıtmaq üçündür, məişət əşyalarının xətlərə atılması arzuolunmazdır".
Elmidar Əliyev
Yasamal rayonunun İnşaatçılar prospektində yaşayış binalarından birinin zirzəmisi su ilə dolub.
Sakinlərin Oxu.Az-a göndərdiyi videogörüntülərdən məlum olur ki, zirzəmidə iki-üç metr dərinlikdə çirkab suları toplanıb.
Məsələ ilə əlaqədar Azərbaycan Dövlət Su Ehtiyatları Agentliyindən Oxu.Az-a bildirilib ki, şikayət müvafiq rayon sukanal idarəsinə yönləndirilib, əraziyə briqada cəlb edilib.
Araşdırmadan sonra lazımi tədbirlər görüləcək.
