Azərbaycan güləşçiləri Avropa çempionatının sonuncu günündə 4 medal qazandılar, birinci oldular

Serbiyanın Novi Sad şəhərində güləş üzrə U-20 Avropa çempionatı sona çatıb.

Oxu.Az xəbər verir ki, bu gün sərbəst güləş üzrə 61, 74, 86, 92 və 125 kq-da medalçılar müəyyənləşiblər.

Camal Abbasov (57 kq) finalda rusiyalı Andrey Midlovetslə qarşılaşıb. Həmyerlimiz ilk hissəni minimal fərqlə öndə tamamlasa da, ikinci hissədə fiziki göstəriciləri ilə seçilən rəqib daha yaxşı güləşib. Yekunda 1:6 hesabı ilə məğlub olan Camal gümüş medalla kifayətlənib.

Sadiq Mustafazadə (86 kq) finalda rusiyalı İbrahim Kadiyevlə güləşib. Milli üzvü güclü rəqibinə 1:9 hesabı ilə məğlub olub və yarışı ikinci pillədə başa vurub.

Anar Cəfərli (97 kq) finalda rusiyalı Mustafaqadji Malaxdibirovla üz-üzə gəlib. Görüşə Anar yaxşı başlasa da, rəqibin silsiləvi "xaç" fəndindən xilas ola bilməyib. Belədə Anar da gümüş medalı boyundan asıb.

Yusif Dursunov (125 kq) təsəlliverici görüşdə italiyalı Martino Pilieroya "tuş"la qalib gəlib. Həmyerlimiz bürünc medal uğrunda ukraynalı İvan Miroşniçenkoyla gərgin mübarizədə sevinən tərəf olub - 3:2. Dursunov fəxri kürsünün üçüncü pilləsinə yüksəlib.

Beləliklə, Azərbaycanın sərbəst güləş üzrə millisi Serbiyanın Novi Sad şəhərində keçirilən 20 yaşlıların Avropa çempionatında birinci olub.