"Benfika" futbol klubunun prezidenti Rui Koşta müdafiəçi Herman Kontinin transferi üzrə Rusiya "Lokomotiv"indən pul köçürməsinə görə məsuliyyətə cəlb oluna bilər.
Oxu.Az xəbər verir ki, bu barədə "CNN Portugal" məlumat yayıb.
Qeyd olunub ki, 53 yaşlı Koşta Rusiya klubunun 76 min avro məbləğində ödəniş etməsi ilə əlaqədar Birləşmiş Millətlər Təşkilatı (BMT) və (və ya) Avropa İttifaqı (Aİ) tərəfindən təsdiq edilmiş məhdudlaşdırıcı tədbirləri pozmaqda şübhəli bilinir. Məlumata görə, funksionerin dindirməsi hələ iyul ayında baş tutmalı idi, lakin müdafiə tərəfi dinləmənin payıza keçirilməsi barədə vəsatət qaldırıb.
Portuqaliya prokurorluğu pulların yuyulması ilə bağlı ittiham irəli sürməyi planlaşdırır. İddia olunur ki, vəsaitlər hər hansı bir vasitəçi olmadan və gizlədilmədən birbaşa Rusiya klubunun hesabından "Benfika"nın "Banco Comercial Português" (BCP) bankındakı hesabına köçürülüb.
Xatırladaq ki, sentyabrın 18-də "Benfika"nın baş məşqçisi Joze Mourinyo təyin olunub.
