2026-cı il dünya çempionatının qrup mərhələsinin üçüncü turu çərçivəsində keçiriləcək Fransa və Norveç yığmaları arasındakı matç güclü tufan səbəbindən ləğv edilmə təhlükəsi ilə üz-üzədir.
Oxu.Az "Le Parisien" nəşrinə istinadən xəbər verir ki, bu gün Foksborodakı "Gillette" stadionunda baş tutması planlaşdırılan qarşılaşma ərəfəsində ABŞ meteorologiya xidməti xəbərdarlıq yayıb.
Mənbənin bildirdiyinə görə, həmin tarixdə oyunun keçiriləcəyi ərazidə təhlükəli tufan dalğası gözlənilir. Qüvvədə olan təhlükəsizlik protokoluna əsasən, bu cür hava şəraitində matçın yarımçıq dayandırılması mümkündür.
Maraqlıdır ki, Fransa yığması dünya çempionatının ikinci turunda İraqla görüşdə də analoji halla üzləşmişdi. Hələ matçdan əvvəl mediada hava şəraitinə görə oyunun ləğv edilə biləcəyi ilə bağlı xəbərlər yayılmışdı. Qarşılaşma vaxtında başlasa da, fasilə zamanı tufan təhlükəsi elan edilib və oyun dayandırılıb. Yekunda isə matçı tamamlamaq mümkün olub və Fransa komandası rəqibindən 3:0 hesabı ilə üstün olub.
Qeyd edək ki, ABŞ, Meksika və Kanadanın birgə ev sahibliyi etdiyi futbol üzrə dünya çempionatı iyunun 11-də start götürüb və iyulun 19-dək davam edəcək.
