Futbol üzrə dünya çempionatında ötən gecə baş tutan həlledici qarşılaşmalar azarkeşlərə təkcə həyəcan yox, həm də bir sıra unikal statistik göstəricilər və yeni rekordlar bəxş edib.
Oxu.Az FIFA-nın rəsmi saytına istinadən xəbər verir ki, Çexiya millisinin üzvü Mixal Sadilek turnirin hazırkı ən erkən qolunun müəllifi kimi tarixə düşüb.
O, matçın 5-ci dəqiqəsinin 8-ci saniyəsində fərqlənməklə, daha əvvəl Kürasao ilə oyunda 5-ci dəqiqənin 16-cı saniyəsində hesabı açan Almaniya yığmasının futbolçusu Feliks Nmeçanın nəticəsini yeniləyib.
Digər bir nəticə İsveçrə millisinin oyunçusu Yohan Manzambidən gəlib. O, 20 yaş 247 günlüyündə fərqlənərək dünya çempionatları tarixində dubla imza atan ən gənc ehtiyat oyunçu ünvanına sahib çıxıb. Qeyd edək ki, bundan əvvəlki rekord 2002-ci ildə Paraqvay - Sloveniya matçında iki dəfə toru silkələyən Nelson Kuevasa (22 yaş 153 gün) məxsus olub.
Diqqətçəkən məqamlardan biri də cari mundialda bu günə qədər təyin olunan altı penalti zərbəsinin hamısının dəqiqliklə qola çevrilməsidir. Belə ki, Breel Embolo (İsveçrə - Qətər), Kay Haverts (Almaniya - Kürasao), Marko Arnautoviç (Avstriya - İraq), Harri Keyn (İngiltərə - Xorvatiya), Teboho Mokoena (Cənubi Afrika - Çexiya) və Qranit Xaka (İsveçrə - Bosniya və Herseqovina) 11 metrlik cərimə zərbələrində qapıçıları məyus edərək yüz faizlik nəticə göstəriblər.
Xatırladaq ki, ABŞ, Meksika və Kanadanın ortaq ev sahibliyi ilə keçirilən bu həyəcan dolu dünya çempionatına iyulun 19-da rəsmən yekun vurulacaq.
