Fransa milli komandasının 2026-cı il dünya çempionatının yarımfinalındakı məğlubiyyəti Parisdə və ölkənin digər şəhərlərində ciddi iğtişaşlara səbəb olub.
Oxu.Az xəbər verir ki, bu barədə "LiveMint" və "Times Now" nəşrləri məlumat yayıb.
Fransa yığmasının İspaniyaya 0:2 hesabı ilə məğlub olmasından sonra hakimin yekun fiti səslənən kimi ölkənin bir çox şəhərlərini xaos bürüyüb. Qəzəblənmiş azarkeşlərlə polis arasında baş verən şiddətli toqquşmalar nəticəsində avtomobillərə ziyan dəyib, ictimai və xüsusi əmlak darmadağın edilib.
Sosial şəbəkə istifadəçiləri isə həm qələbə, həm də məğlubiyyət zamanı küçələri dağıdan fanatların sağlam düşüncəsini sual altına alaraq, bu etirazları ələ salıblar. İstifadəçilərdən biri vəziyyətə sarkazmla belə reaksiya verib: "Deyəsən, fransızlar yeni idman növü kəşf ediblər - etiraz futbolu".
Məyus olmuş azarkeşlərin dağıntılar törədəcəyindən ehtiyat edən Fransa polisi məşhur Yelisey çöllərini hərəkətə tamamilə bağlayıb. Mümkün iğtişaşlar ərəfəsində Paris polisi tam döyüş hazırlığı vəziyyətinə gətirilib.
Qeyd edək ki, Fransa rəsmiləri ehtimal olunan iğtişaşlara əvvəlcədən hazırlaşmışdılar. Belə ki, yarımfinal matçı milli bayram olan Bastiliyanın alınması Günü ilə üst-üstə düşdüyü üçün bütün ölkə boyu 70 min, o cümlədən paytaxtda 5 minə yaxın polis və jandarm əməkdaşı xidmətə cəlb olunmuşdu.
