Fransanın PSJ futbol klubu unikal tarixi nailiyyətə imza atıb. Paris təmsilçisi ardıcıl iki il 9 futbolçusu "Qızıl top" ("Ballon d'Or") mükafatına namizəd göstərilən ilk klub olub.
Oxu.Az xəbər verir ki, "France Football" jurnalının təsis etdiyi və təqdimetmə mərasimi oktyabrın 26-da Londonda keçiriləcək nüfuzlu mükafata iddiaçıların siyahısında PSJ oyunçuları üstünlük təşkil edir.
Mükafatın son qalibi Usman Dembeledən başqa, ən yaxşı 30 futbolçu sırasına Əşrəf Hakimi, Nunu Mendeş, Vitinya, Joau Neveş, Fabian Ruis, Xviça Kvaratsxeliya, Vilyam Paço və Markinyos daxil ediliblər. Bundan əlavə, bu yay "Barselona"dan kluba keçən və namizədlər arasında yer alan Ferran Torres də bu siyahıdadır.
Ümumilikdə Çempionlar Liqasının son qalibləri 10 namizədlə siyahıda ən çox təmsil olunan klub statusunu qoruyurlar. Onlar cəmi dörd nümayəndəsi olan "Bavariya"nı inamla geridə qoyurlar. Ötən il də PSJ-nin 9 futbolçusu "Qızıl top"a namizəd göstərilmişdi. Dünya futbolu tarixində heç bir klub iki mövsüm ardıcıl olaraq bu mükafatda kütləvi təmsilçiliyə nail ola bilməyib.
