Rəşad Sadıqov: "Ən çox Vaqif Cavadovun komandasından çəkinirdik"

"Vaqif Cavadovun "Sumqayıt"dan istefaya göndərilməsi xəbərini mətbuatdan oxuyub məyus oldum".

Oxu.Az xəbər verir ki, bu sözləri "Sağlam Radio 93 FM"in "Offside" verilişində bu gün qonaq olan "Zirə" klubunun baş məşqçisi Rəşad Sadıqov deyib.

Təcrübəli çalışdırıcı Vaqif Cavadovun "Sumqayıt"dan gözlənilmədən ayrılması barədə danışıb:

"Sumqayıt" ötən mövsümü 4-cü yerdə bitirib avrokuboklara vəsiqə qazanmışdı. Ona görə cari mövsümdə ambisiyalı olmaqları normal hal idi. Ancaq "Sumqayıt" mövsümə uğursuz başlamışdı. Vaqif Cavadov komandanı götürdükdə artıq problemlər var idi. O, həmin dövrdə komandaya yaxşı enerji ötürdü, üst-üstə vacib qələbələr qazanıldı. Halbuki "Sumqayıt" indi I Liqaya düşməmək üçün də mübarizə apara bilərdi. Bu vəzifənin öhdəsindən bir neçə tur öncə gəldilər. Son turlardakı uğursuzluqları onunla əlaqələndirərdim ki, mövsümün sonudur, xal ehtiyatlarını lazımi səviyyəyə çatdırıblar. Ola bilsin ki, komandada motivasiya bir az aşağı düşmüşdü. Ancaq Vaqif özü oyunlarda, mətbuat konfranslarında istəkli idi, hələ də qələbə qazanmaq arzusunu büruzə verirdi. İstəməzdim ki, ağır dövrdə gənc məşqçilərimiz önə verilsin, 5-6 ay sonra dəyişdirilsin. Gənc məşqçilərimizin belə hallarda istifadə olunmasına qarşıyam".

R.Sadıqov Azərbaycan futbolunda dərhal nəticə tələb olunmasından narazılığını da gizlətməyib:

"Biz ən çox Vaqif Cavadovun komandasından çəkinirdik. Hazırlıq prosesində həmişə bu məqama önəm verirdik. Çünki o, yaxşı komanda formalaşdırmışdı. Təəssüf ki, bizdə yanaşma fərqlidir. Bəzi klub rəhbərləri məşqçilərdən dərhal nəticə tələb edirlər. Amma istənilən halda, Vaqif Cavadov yaxşı təcrübə qazandı. Ona gələcək karyerasında uğurlar arzulayıram".

Qeyd edək ki, ötən ilin oktyabrında baş məşqçi təyin olunan V.Cavadov bu gün "Sumqayıt"la yollarını ayırıb.