"Son illər dünyada və bölgəmizdə baş verən geosiyasi və texnoloji proseslər informasiya təhlükəsizliyini və kritik infrastrukturların müdafiəsini dövlətlərin milli təhlükəsizlik gündəliyinin ən ön sırasına gətirib. "Azərbaycan Respublikasının informasiya təhlükəsizliyi və kibertəhlükəsizliyə dair 2023-27-ci illər üçün Strategiyası" bu istiqamətdə əsas yol xəritəmiz olmaqla, dövlətimizin informasiya məkanında davamlılığın, dayanıqlığın və etibarlılığın təmin olunmasına xidmət edir".
Oxu.Az xəbər verir ki, bunu Xüsusi Rabitə və İnformasiya Təhlükəsizliyi Dövlət Xidmətinin rəisi, general-leytenant İlqar Musayev Bakı Konqres Mərkəzində keçirilən "CIDC 2025 - Critical Infrastructure Defence Challenge" kibertəhlükəsizlik festivalında deyib.
O bildirib ki, burada kritik informasiya sistemlərinin kibermüdafiə qabiliyyətinin artırılması, böhran vəziyyətlərində idarəetmə ssenarilərinin simulyasiya olunması və yeni texnoloji yanaşmaların tətbiqi reallaşdırılır:
"İki gün ərzində informasiya təhlükəsizliyi sahəsində həm yerli, həm də xarici ekspertlərin iştirakı ilə 10 təqdimat və beş panel müzakirəsi keçiriləcək. Bundan əlavə, 60-dan çox şirkətin qatıldığı kibertəhlükəsizlik həlləri sərgisi, virtual CTF yarışları, 360 mütəxəssisə ödənişsiz xüsusi ekspert təlimlərinin təşkili və "Ağıllı şəhərlərdə kibermüharibə" adlı virtual yarış proqramın əsas hissələrini təşkil edir. Bu yarışın adı - "Ağıllı şəhərlərdə kibermüharibə" - təsadüfi seçilməyib. Artıq yaxın gələcəkdə ölkələrin rəqəmsal infrastrukturunun əsasını süni intellekt və maşın öyrənməsi ilə idarəolunan ağıllı şəhərlər təşkil edəcək.
Yarışda Bakı şəhərinin hava, quru və su sahələrini əhatə edən kritik infrastrukturları virtual olaraq simulyasiya edilib. Yarış iştirakçıları bu infrastrukturların informasiya təhlükəsizliyini analiz edərək onların zəifliklərini aşkarlamalıdırlar.
Hazırda enerji idarəetmə sistemlərindən tutmuş nəqliyyat şəbəkələrinə, səhiyyədən təhsil sistemlərinə qədər bir çox sahə sürətlə rəqəmsallaşır. Amma bu sistemlərin hər biri kibermühitdə potensial hədəfə çevrilə bilər. Kibertəhlükəsizlik məsələləri bu gün, sadəcə, texniki məsələ deyil - milli təhlükəsizlik məsələsinə çevrilməkdədir".
"Bu baxımdan, keçiriləcək "Ağıllı şəhərlərdə kibermüharibə" yarışı xüsusi əhəmiyyət daşıyır. 20 yerli və beş xarici ölkədən iştirak edən komandalar bu yarışda öz bilik və bacarıqlarını real ssenarilər üzərində sınaqdan keçirəcəklər. Bu yarış yalnız bir rəqabət platforması deyil - həm də öyrənmək, təcrübə toplamaq və əməkdaşlığı gücləndirmək üçün mühüm fürsətdir", - deyə xidmət rəisi əlavə edib.
Mərahim Nəsib
