"Rusiya, Azərbaycan, Türkmənistandan mümkün olduğu qədər çox təbii qaz almalıyıq".
Oxu.Az-ın "CNN Türk" telekanalına istinadən verdiyi xəbərə görə, bu sözləri Türkiyənin enerji və təbii sərvətlər naziri Alparslan Bayraktar deyib.
"Qış mövsümü yaxınlaşır. Vətəndaşlarımıza "qaz yoxdur" deyə bilmərik. Bizim Rusiyadan, Azərbaycandan və Türkmənistandan mümkün olan qədər qaz almalıyıq. Təchizat üçün ayrı-seçkilik olmadan bu resurslara çıxışı təmin etməliyik", - deyə o vurğulayıb.
Nazir əlavə edib ki, Avropa Azərbaycandan qaz tədarükü məsələsində bir-birinə uyğun gələn siyasət yeritmir: "Bir tərəfdən Avropanın qaza ehtiyacı olduğu görünür. Azərbaycan Avropaya daha çox qaz tədarük etmək istəyir. Lakin hasilatı artırmaq üçün sərmayə qoymalıdır. Avropa ölkələri bu mənada bir-birinə uyğun gələn siyasət yeritmir", - deyə nazir vurğulayıb.
