Azərbaycan-Niderland biznes forumu keçirilə bilər

Aprelin 9-da İqtisadiyyat və sənaye naziri Şahin Mustafayev Niderland Krallığının Azərbaycan Respublikasındakı fövqəladə və səlahiyyətli səfiri Robert Jan Qabrielseni ilə görüşüb.

Bu barədə Oxu.Az-a nazirlikdən məlumat verilib.

Nazirliyin məlumatına görə, görüşdə əlaqələrin genişlənməsində qarşılıqlı səfərlərin əhəmiyyəti qeyd edilib, Azərbaycan nümayəndə heyətinin aprel ayında Niderlanda nəzərdə tutulan səfəri və səfər çərçivəsində Azərbaycan-Niderland biznes forumunun təşkili məsələlərinə dair müzakirələr aparılıb.

Qeyd edək ki, tərəflər arasında əldə edilmiş razılığa əsasən, aprelin 23-24-də iqtisadiyyat və sənaye naziri Şahin Mustafayevin Niderland Krallığına rəsmi səfəri çərçivəsində Maastrixt şəhərində Niderland-Azərbaycan biznes forumu keçiriləcək.

Azərbaycanda İxracın və İnvestisiyaların Təşviqi Fondundan (AZPROMO) verilən məlumata görə, forum çərçivəsində Azərbaycan sahibkarları Niderlandda işgüzar əlaqələr qurmaq və özlərinə tərəfdaşlar tapmaq imkanı əldə edəcəklər.
 

www.oxu.az