Növbəti il üzrə təhsil xərclərinə 5 milyard 99 milyon manat məbləğində vəsait ayrılması proqnozlaşdırılır. Bu, 2026-cı illə müqayisədə 82.6 milyon manat və ya 1.6 faiz, 2025-ci ilin icrası ilə müqayisədə isə 479.5 milyon manat və ya 10.4 faiz çoxdur.
Oxu.Az xəbər verir ki, sözügedən məsələ Milli Məclisin İqtisadi siyasət, sənaye və sahibkarlıq komitəsinin bugünkü iclasında müzakirəyə çıxarılan "Azərbaycan Respublikasının 2027-ci il dövlət büdcəsi haqqında" Qanun layihəsində əksini tapıb.
Həmin xərclərin ÜDM-də xüsusi çəkisi 3.6 faiz, dövlət büdcəsi xərclərinin tərkibində xüsusi çəkisi isə 12 faiz təşkil edəcək.
2023-cü illə müqayisədə 2027-ci ildə təhsil xərclərinin dövlət büdcəsi xərclərinin tərkibində xüsusi çəkisi 0.7 faiz bəndi, mütləq ifadədə isə 974.2 milyon manat və ya 23.6 faiz artıb.
Bu xərc bölməsi üzrə proqnozlaşdırılan vəsaitin 2 milyard 185 milyon 400 min manatı və ya 42.9 faizi ümumi təhsil xərclərinə, 853 milyon 500 min manatı və ya 16.7 faizi ali təhsil və dövlət sifarişi ilə ali təhsilin maliyyələşdirilməsinə, 434 milyon 800 min manat və ya 8.5 faizi məktəbəqədər təhsil xərclərinə, 102 milyon 100 min manat və ya 2 faizi orta ixtisas təhsili, 115 milyon 400 min manat və ya 2.3 faizi peşə təhsili, 96 milyon 900 min manatı və ya 1.9 faizi məktəbdənkənar təhsil müəssisələrinin (idman məktəbləri və s.) xərclərinə, 25 milyon 600 min manatı və ya 0.5 faizi əlavə təhsil və tətbiqi tədqiqatlara, 1 milyard 285 milyon 300 min manatı və ya 25.2 faizi təhsil sahəsində digər müəssisə və tədbirlərlə bağlı xərclər üçün nəzərdə tutulub.
