Azərbaycanda çoxpilləli pensiya sisteminin, xüsusilə ikinci və üçüncü pensiya sütunlarının inkişafı həm pensiya təminatının dayanıqlığını artırmağa, həm də maliyyə bazarına uzunmüddətli investisiya resursları cəlb etməyə imkan verə bilər.
Bunu "Pensions Europe" təşkilatının baş katibi Matti Leppala Oxu.Az-a açıqlamasında deyib.
Onun sözlərinə görə, Azərbaycanda fondlaşdırılmış pensiya sisteminin genişləndirilməsi üçün böyük potensial var, lakin əsas məsələ vətəndaşların bu sistemə cəlb olunmasıdır.
M.Leppala bildirib ki, çoxpilləli pensiya modeli dövlət büdcəsi üzərindəki yükü azalda, investisiya gəlirləri hesabına sistemin maliyyə dayanıqlığını gücləndirə bilər.
O əlavə edib ki, özəl pensiya fondlarının yaradılması yerli kapital bazarlarının inkişafına da mühüm töhfə verə bilər:
"Bir çox ölkələrin təcrübəsi göstərir ki, özəl pensiya fondları yerli kapital bazarlarına və şirkətlərə daha çox investisiya yatırır. Bu, iqtisadi inkişaf və kapital bazarlarının dərinləşməsi baxımından müsbət nəticələr verir".
