"Hüquqi və tənzimləyici baza formalaşdıqdan sonra, banklar müəyyən islam bankçılığı məhsullarını təqdim etməyə başlaya biləcəklər. Məqsədimiz gələn ildən etibarən islam bankçılığı məhsullarını Azərbaycanda bazara çıxarmaqdır".
Oxu.Az bunu Azərbaycan Respublikası Mərkəzi Bankının Maliyyə Sektorunun Davamlı İnkişafı Departamentinin direktoru Rüstəm Tahirov 2-ci Azərbaycan Halal Biznes (AZHAB) Forumunda "İnkişaf etməkdə olan bazarlarda islam maliyyəsi üçün rəqabətli mühitin yaradılması: Müxtəlif regionlardan təcrübələr və öyrənilmiş dərslər" mövzusunda aparılan panel müzakirəsində deyib.
Rüstəm Tahirov qeyd edib ki, digər ölkələrin - Malayziya, Türkiyə, Pakistan və başqalarının təcrübəsinə baxdıqda, onların son onilliklərdə nə qədər böyük irəliləyiş əldə etdiyini görmək mümkündür:
"Hazırda bu ölkələrdə islam maliyyəsi maliyyə sisteminin mühüm hissəsinə çevrilib.
Digər tərəfdən, MDB ölkələrində bu sahə hələlik ümumi maliyyə sektorunda ciddi paya malik deyil. Bu səbəbdən, biz həmin təcrübələri öyrənərək, Azərbaycan üçün özünəməxsus və təhlükəsiz inkişaf modeli müəyyənləşdirmişik.
Beynəlxalq təcrübəni nəzərə alaraq, biz təhlükəsiz və mərhələli yanaşma seçmişik. Bu, ənənəvi banklarda "İslam pəncərəsi" modeli vasitəsilə ilkin islam bankçılığı məhsullarının tətbiqindən başlayır. Bu model bizə bazardakı tələbi sınamağa, iştirakçıları bu məhsullarla tanış etməyə və nəticələr əsasında daha geniş məhsullar təqdim etməyə imkan verəcək".
Onun sözlərinə görə, bu strategiyanı həyata keçirmək üçün Mərkəzi Bank bir yol xəritəsi hazırlayıb:
"Bu planı dörd əsas mərhələyə bölmək olar:
Birinci mərhələ - ilkin tətbiq ediləcək İslam bankçılığı məhsullarının müəyyənləşdirilməsi. Bu məqsədlə biz banklarla, investisiya birlikləri və ekspertlərlə müzakirələr apararaq müştəri tələblərini və bazar ehtiyaclarını analiz etdik və tətbiq üçün bir neçə əsas məhsul müəyyən etdik. Bu mərhələ artıq tamamlanıb.
İkinci mərhələ - bu məhsulların tətbiqi üçün hüquqi və tənzimləyici çərçivənin hazırlanmasıdır. Bunun üçün Mülki Məcəllə, Vergi Məcəlləsi, Bankçılıq Qanunu və digər normativ aktlara dəyişikliklər üzərində işlənilir. Bu dəyişikliklər artıq bank sektoruna təqdim olunub və biz onların rəy və təkliflərini toplayırıq. Məqsədimiz, bu rəyləri birləşdirib, ilin sonuna qədər hökumətlərarası razılaşdırma mərhələsinə təqdim etməkdir.
Üçüncü istiqamət - insan kapitalının və bacarıqların inkişafıdır. Bu, yol xəritəsinin ən vacib hissələrindən biridir. Biz artıq Türkiyə, Pakistan, Qırğızıstan və digər ölkələrin müvafiq qurumları ilə əməkdaşlığa başlamışıq. Xüsusilə Pakistan Mərkəzi Bankı ilə birlikdə Azərbaycan Mərkəzi Bankının nəzarətçiləri və tənzimləyiciləri üçün təlim proqramı təşkil olunub. Bu istiqamətdə əməkdaşlığı davam etdirməyi planlaşdırırıq.
Bu minimum hüquqi və tənzimləyici baza formalaşdıqdan sonra, banklar islam pəncərəsi vasitəsilə müəyyən islam bankçılığı məhsullarını təqdim etməyə başlaya biləcəklər. Mərkəzi Bank isə bu ilkin mərhələnin gedişatını yaxından izləyəcək, nəticələrə əsasən növbəti addımları və əlavə ediləcək yeni məhsulları müəyyən edəcək.
Biz bu prosesi həyata keçirərkən yerli tərəfdaşlarla, regional həmkarlarla və beynəlxalq təşkilatlarla sıx əməkdaşlıq edəcəyik.
Məqsədimiz gələn ildən etibarən islam bankçılığı məhsullarını Azərbaycanda bazara çıxarmaqdır".
Aygün Mirakif
