Paytaxt və bəzi rayonlarda torpaq sahəsi tikinti altına düşən vətəndaşlara kompensasiya ödəniləcək.
Oxu.Az xəbər verir ki, bununla "Tikilməkdə Olan Obyektlərin Müdiriyyəti" publik hüquqi şəxsi (PHŞ) tender elan edib.
Belə ki, qurum vətəndaşlara dəyən ziyanın hesablanması xidmətinin satın alınması üçün tender elan edib. PHŞ görüləcək hesablama işləri müqabilində 16 992 manat ödəməyi planlaşdırır.
Layihə çərçivəsində aşağıdakı qiymətləndirmə işləri aparılacaq:
- Böyükşor Tullantı Sutəmizləyici Qurğusunun tikintisi layihəsi çərçivəsində tikinti altına düşən torpaq sahələri (xüsusi mülkiyyət) - 1 sahə;
- Salyan şəhərinin su və kanalizasiya sisteminin yenidən qurulması ilə bağlı layihə üzrə (xüsusi mülkiyyət) - 3 sahə;
- Eyni layihə çərçivəsində (bələdiyyə mülkiyyəti) - 14 sahə;
- Xaçmaz rayonunda əkin sahələrinin su təminatının yaxşılaşdırılması layihəsi üzrə (xüsusi mülkiyyət) - 3 sahə;
- Eyni layihə çərçivəsində (bələdiyyə mülkiyyəti) - 22 sahə.
Beləliklə, ümumilikdə müxtəlif regionlarda yerləşən torpaq sahələri üzrə vətəndaşlara dəyən ziyanın məbləğinin müəyyənləşdirilməsi nəzərdə tutulur.
Qeyd edək ki, satınalma birbaşa kompensasiyanın ödənilməsi deyil, həmin ərazilərdə həyata keçirilən layihələr zamanı mülkiyyətçilərə dəyən ziyanın hesablanması üçün qiymətləndirmə xidmətinin alınmasını əhatə edir. Bu isə növbəti mərhələdə kompensasiya ödənişlərinin həyata keçirilməsi üçün əsas rol oynayır.
Müsabiqə 18 mart 2026-cı il tarixində dərc olunub. Təkliflərin son təqdim olunma və zərflərin açılış tarixi 20 aprel 2026-cı il saat 15:00-a təyin edilib.
