"Orta Dəhliz üçün 28 milyard dollar investisiyaya ehtiyac var".
Oxu.Az xəbər verir ki, bunu Asiya İnfrastruktur İnvestisiya Bankının (AIIB) baş direktoru Xiaohonq Yanq Bakıda keçirilən İslam İnkişaf Bankının İllik Toplantıları çərçivəsində təşkil olunan "Dayanıqlı nəqliyyat və ticarət üçün Orta Dəhlizin maliyyələşdirilməsi" sessiyasında deyib.
Onun sözlərinə görə, Orta Dəhlizin tam fəaliyyəti üçün növbəti üç ildə təxminən 28 milyard ABŞ dolları həcmində investisiya tələb olunur. O qeyd edib ki, daşınma müddəti 30 gündən 18 günə qədər azalsa da, bu göstərici hələ də yüksəkdir.
Xiaohonq Yanq bildirib ki, əsas prioritet maliyyələşdirilə bilən infrastruktur layihələrinin həyata keçirilməsi və əməliyyat səmərəliliyinin artırılmasıdır. Onun sözlərinə görə, marşrutun investorlar və yükdaşıyıcılar üçün cəlbedici olması baxımından etibarlılıq və proqnozlaşdırılması vacibdir.
AIIB rəsmisi vurğulayıb ki, Orta Dəhlizin səmərəli fəaliyyəti üçün yalnız avtomobil və dəmir yolları deyil, limanlar, gəmilər, hava limanları, əməliyyat sistemləri və rəqəmsal platformalar da vahid şəkildə işləməlidir.
O, həmçinin Azərbaycanda nəqliyyat və logistika sahəsində aparılan modernləşdirmə işlərini yüksək qiymətləndirib.
