Biləsuvar rayonunda 17 yaşlı oğlanın qohumunu bıçaqlamasının təfərrüatı məlum olub.
Oxu.Az-ın məlumatına görə, hadisə bu gün səhər saatlarında, rayonun Nərimankənd kəndində baş verib.
Kənd sakini, 1966-cı il təvəllüdlü Azər Babayev dünən axşam saatlarında evində gəlini Arzu Abuzərli ilə mübahisə edib. Mübahisə nəticəsində A.Babayev gəlini döyüb. Arzu Abuzərli bu barədə atasına məlumat verib və valideynləri gəlib onu öz evlərinə aparıb. Hadisə vaxtı A.Babayevlə gəlinin atası arasında da sözlü mübahisə olub və məlumata görə, A.Babayev gəlini və onun atasını söyüb.
Avqustun 20-si səhər saat 7 radələrində gəlinin qardaşı, 2008-ci il təvəllüdlü Kənan Abuzərli evlərindən mətbəx bıçağını götürərək Azər Babayevin yaşadığı evin həyətindəki ayaqyolunun arxasında gizlənib. A.Babayev səhər saatlarında yuxudan durub ayaqyoluna gedərkən K.Abuzərli qəfil çıxaraq ona bir-neçə bıçaq zərbəsi endirib və hadisə yerindən qaçıb.
A.Babayev müxtəlif bədən xəsarətləri ilə Biləsuvar Rayon Mərkəzi Xəstəxanasına çatdırılıb və təcili əməliyyat olunub. Hazırda xəstənin vəziyyəti ağır olaraq qiymətləndirilir.
Polis əməkdaşlarının keçirdiyi əməliyyat nəticəsində hadisəni törətməkdə şübhəli bilinən K.Abuzərli saxlanılıb.
Faktla bağlı cinayət işi başlanıb.
Samir Əli
Biləsuvarda bacısının qayınatasını bıçaqlamaqda şübhəli bilinən 17 yaşlı yeniyetmə tutulub.
DİN-in Mətbuat Xidmətinin Lənkəran regional qrupundan Oxu.Az-ın sorğusuna cavab olaraq bildirilib ki, əməli törətməkdə şübhəli bilinən 2008-ci il təvəllüdlü K.Abuzərov polis əməkdaşları tərəfindən saxlanılıb.
Araşdırma aparılır.
Biləsuvar rayonunda bıçaqlanma hadisəsi baş verib.
Oxu.Az xəbər verir ki, hadisə rayonun Nərimankənd kəndində qeydə alınıb.
Həmin kənd sakini, 2008-ci il təvəllüdlü Kənan Abuzərli həmkəndlisi 1966-cı il təvəllüdlü Azər Babayevi bıçaqlayıb.
A.Babayev bədəninin müxtəlif nahiyələrinin deşilmiş yaraları ilə Biləsuvar Rayon Mərkəzi Xəstəxanasına çatdırılıb. O, təcili əməliyyat blokuna alınaraq cərrahi əməliyyat olunub. Hazırda vəziyyəti qənaətbəxşdir.
Məlumata görə, hadisəni törədən yeniyetmənin bacısı xəsarət yetirdiyi şəxsin gəlinidir. Hadisəyə səbəb kimi ailədaxili münaqişə göstərilir.
Faktla bağlı araşdırma aparılır.
Aytac Qasımova
