Dövlət əleyhinə çağırışlar etməkdə təqsirləndirilən Ərəstun Oruclunun məhkəməsi başlayıb.
Oxu.Az-ın məlumatına görə Bakı Ağır Cinayətlər Məhkəməsində hakim Babək Pənahovun sədrliyi ilə keçirilən prosesdə müttəhimin anket məlumatları dəqiqləşdirilib.
Məhkəmə cinayət işinin məhkəmə araşdırmasına verilməsinə dair qərar qəbul edilib.
İlk məhkəmə baxış iclası yanvarın 14-nə təyin olunub.
Qeyd edək ki, Ərəstun Oruclunun barəsində Cinayət Məcəlləsinin 281.2-ci (Dövlət əleyhinə yönələn açıq çağırışlar, təkrar və ya bir qrup şəxs tərəfindən törədildikdə) maddəsi ilə təqsirləndirilən şəxs qismində cəlbetmə haqqında qərar qəbul edilib. Bildirilib ki, o, istintaqdan qaçaraq Azərbaycan hüdudlarından kənarda gizləndiyi üçün barəsində ittiham elan edilməsi məqsədilə axtarış elan edilib.
Binəqədi Rayon Məhkəməsinin 2025-ci il 23 fevral tarixli qərarı ilə onun haqqında qiyabi həbs qətimkan tədbiri seçilib. Həmin il sentyabrın 18-də ittihamın məzmununa əlavələr və dəyişikliklər edilərək Ərəstun Oruclu barəsində Cinayət Məcəlləsinin 220.2-ci və 281.2-ci maddələri ilə təqsirləndirilən şəxs qismində cəlbetmə haqqında qərar verilib.
Qeyd olunub ki, o, "YouTube" internet platformasında 4 yanvar 2023-cü ildə və 24 oktyabr 2024-cü ildə qeyriləri ilə qabaqcadan əlbir olan bir qrup şəxs halında birləşərək Azərbaycanda qanuni əsaslarla formalaşmış və fəaliyyət göstərən mövcud hakimiyyətə qarşı zor tətbiqi çıxmağı təşviq edən açıq çağırışlar edib və yayıb.
