Məhkəmə Şəkili Yusifin qumara görə həbs edilmiş qohumu barədə qərar verib

Qumarxana təşkiletmə, külli miqdarda vergilərdən yayınma və qanunsuz sahibkarlıq ittihamları üzrə saxlanılan Urfan Quliyevin cinayət işinin məhkəmə istintaqı yekunlaşıb.

Təqsirləndirilənin vəkili Hikmət Əliyevin Oxu.Az-a verdiyi məlumata görə, Bakı Ağır Cinayətlər Məhkəməsinin hakimi Leyla Əskərova-Məmmədovanın sədrliyi ilə keçirilən son prosesdə Urfan Quliyev təqsirsiz hesab edilərək barəsində bəraət hökmü çıxarılıb.

İstintaq materiallarına əsasən, U.Quliyev Yasamal rayonunda yerləşən çay evlərinin birində qumar oyunları təşkil edib. Dövlət Vergi Xidməti əməkdaşları tərəfindən 2021-ci ildə keçirilən əməliyyat zamanı Urfan qohumu, qumar oyunlarının təşkilinə görə hazırda həbsdə olan Şəkili Yusiflə birgə çayxanada olub.

Toplanmış sübutlar əsasında Urfan Quliyev cinayət məsuliyyətinə cəlb edilib.

İstintaq orqanı Urfan Quliyevin internet üzərindən qumar oyunlarının təşkilindən üç milyon manat gəlir əldə etdiyini, eyni zamanda, iki milyon manata yaxın sadələşdirilmiş vergini ödəməkdən yayındığını müəyyən edib. 2023-cü ilin iyun ayında həbs edilən Urfan bir ay sonra azadlığa buraxılıb, hökmə qədər ev dustaqlığında qalıb.

Təqsirləndirilən şəxs məhkəmədə özünü təqsirli bilməyib, qumar oyunlarını yalnız özü üçün oynadığını deyib. O, həmçinin Yasamal rayonunda mərc oyunları ilə bağlı məntəqə də işlədib.

Təqsirləndirilən şəxsin vəkili Hikmət Əliyev müdafiə çıxışında müvəkkilinin təqsirsizliyini sübut edən əsasları göstərməklə bütün epizodlar üzrə bəraət hökmü çıxarılmasını xahiş edib. Şahidlərdən bir neçəsi də müdafiə tərəfinin lehinə ifadə verib.

Yekunda toplanmış sübutlar əsasında təqsirləndirilən şəxsə qumarxana təşkiletmə və xüsusilə külli miqdarda vergiləri ödəməkdən yayınma maddələri ilə bəraət verilib. Məhkəmə belə qənaətə gəlib ki, təqsirləndirilən şəxs qeyri-qanuni işlə məşğul olduğundan, vergi ödəməməsi həmin fəaliyyətin nəticəsi kimi qiymətləndirilməlidir. Beləliklə, o, ittiham edildiyi üç maddədən ikisi üzrə bəraət ala bilib. Ona qanunsuz sahibkarlıq maddəsi ilə verilmiş ittiham isə tövsif edilib.

Hökmə əsasən, Urfan Quliyev yalnız qanunsuz lotereya və mərc oyunlarının təşkil edilməsində təqsirli bilinib. Bu ittihamla ona bir il 10 ay 10 gün azadlıqdan məhrumetmə cəzası təyin edilib. Onun həbsdə və ev dustaqlığında olduğu müddət də buraya daxil edildiyi üçün cəza çəkilmiş hesab edilib.

Hökm apellyasiya instansiyasında qanuni qüvvəyə minənə kimi U.Quliyev barəsində "başqa yerə getməmək haqqında" iltizam qətimkan tədbiri seçilib.

Qeyd edək ki, Urfandan iki il sonra qohumu Yusif Baqiyev həbs edilib. Onun işi üzrə Baş Prokuror yanında Korrupsiyaya qarşı Mübarizə Baş İdarəsində istintaq aparılır. İlkin ittihama görə, Yusif qumarxana təşkilindən 161 milyon manat gəlir əldə edib.